Ahente sa ahente

Maayo ra na nimo di pa ka ana? Makabayad na ka’s imong mga utang nabasa ni Vina ang e-mail sa internet ni Carol kapuyo sa iyang anak nga si Arman. Giayoayohan ni Vina og tagad si Caro. Unya mora na’g si kinsa nga binalaye niya.

Nagduda pa man gani siya kun ang usa ka tuig nilang anak nga si Lydia, si Arman ba gyud ang amahan. Nakahunahuna gani siya nga pakuhaa’g DNA test si Lydia. Apan dili na maoy dinalian ug importante karong panahona. Ang dinalian ang paghalin sa iyang yuta ug balay sa baybayon sa baryo Tigpasal.

Lain og tunada ang maong mensahe. Puwerteng lagota ni Vina. Hapit siya kabaloson pag-email sa pag-ingon “si kinsa ka ba nga magbuot ka’s akong hukom ining butanga?”

Apan nagpugong lang siya. Gihaylo si Vina ni Carol nga padawaton na lang og 2.5 million ka pesos alang sa iyang bahin. Kay ang German niyang nabana ug nadiborsiyoan na karon, dunay buyer sa yuta ug balay nga ilang napundar.

Apan sa hukom sa husgado sa diborsiyo sa America, nga ang tanang kabtangan maadto ni Vina. Labing gamay niyang dawaton kun dunay buyer ang maong butang, diyes milyones. Way katungod ang langyaw nga makatag-iya og yuta sa Pilipinas.

May ahente nga taga Tigpasal nga higala ni Vina nga maoy gikunsabo sa iyang bana nga bagsik nga German. May pagka-Hitler og kinaiya iyang bana nga si Hans. Bisa’g naminyo na og laing Pilipina si Hans, manghilabot gihapon sa yuta ug balay ni Vina. Nasabot niya nga giduol ug gigalgal si Carol nila nga ipakombinsi siya aron modawat na lang og gamay’ng kantidad.

Kasamtangang nia sa America si Vina, kay nanarbaho samtang wa pa nahalin iyang butang. Kay nakautang siya’g dako tungod sa kamahal sa abogado sa America diin didto niya gipasaka ang kasong diborsiyo.

“Pipila kahay gisaad sa mga buang nga ihatag ni Carol, kun mosugot ko’s gihangyo ini?!” tuaw ni Vina samtang nag-atubang sa screen sa computer.

“Kun gusto ka pang motagad ko nimo isip kapuyo sa akong anak, ayaw na pag-apil-apil ining problemaha. Kausa ra ko mohisgot ini ug di na ni nako sublion.” Mao ni gimakinilya niya sa computer aron ibalos og email ngadtong Carol.

Natataw na gyud niya nga ang pag-ayo-ayo og tagad ni Carol ngadto niya, tungod kay may giapas.

Imbis nga duna untay ipadala si Vina nga mga regalo ngadtong Carol, adto na lang niya ipadala sa iyang mga igsuon. Ug nakahukom siya nga aron di na magsamok-samok ning German, iya na lang ipa-deport. Nikontak siya’s iyang abogado. Iyang gipangukay sa hunos iyang mga papeles labi na ang Medical Certificates pagmatuod nga gidagmalan siya sa German sa dihang diha pa sila namuyo sa Pilipinas. (Kataposan)