Gugmang nabalaw

Biyernes sa gabii gikuyogan ko si bay Randy sa pagpamisita kang Elsa nga klasmet niya sa ikaupat nga ang-ang sa hayskol. Matahom ug adunay maayong pamatasan kini si Elsa  nga maoy hinungdan sa dakoay nga gugma ni bay Randy sa dalaga.

Mihangyo man gud si bay Randy nako nga magpakuyog kay lagi maulaw siyang magpakita sa pamilya ni Elsa nga mag-inusara. Taudtaod gayud ang panagsulti sa duruha samtang naglingkod sa sopa ug ako usab, nagkalingaw lang og basa sa hulad sa  pamantalaan samtang naglingkod sa atbang nga lingkoranan.

Dihang namauli na kami, gisukot ko dayon si bay Randy kabahin sa iyang pagpangulitawo kang Elsa.

“Walay kapuslanan ang gitudlo mo, bay Rey!” ni Randy pa sa tingog nga daw agulo. Mitibi ang iyang mga ngabi. “Insulto lang ang akong nadungog gikan kaniya. Matud pa niya kanako, ang ako kunong kalaksot angay lamang usab sa mga babayeng laksot ug dili sama kaniya nga matahom!”

Milingolingo ko samtang mitutok sa akong higala. Unya nabatyagan kong daw gikumot ang akong kasingkasing sa tumang kaluoy kang bay Randy. “Pag-antos lang bay...” Nako pa dayong pikpik sa iyang abaga. “Ang mag-antos, masantos gayud!”

Tungod sa maong hitabo, kanunay na lang nga maghinuktok si bay Randy. Dili na gani siya hapit motambong sa iyang trabaho. Ug tungod sa akong kaluoy kaniya, kanunay ko siyang gibisitahan sa ilang balay ug pagadad-an og bino nga iyang paborito.

Usa ka gabii niana, gikuyogan ko na usab si bay Randy sa pagpamisita kang Elsa. Dala namo ang pungpong sa pula nga rosas ug chocolate cake nga paborito ni Elsa sa pamasin nga tungod niini, maaghat na gayud si Elsa sa pagsugot kang bay Randy.

Paghimuntog sa among mga tiil sa siradong pultahan sa balay nila ni Elsa, mihunong sa makadiyot si bay Randy ug misunod usab ako. Unya gikuot ni bay Randy ang sudlay nga gisulod niya sa luyong bulsa sa gisul-ob niyang karsones nga maong ug gihapay ang iyang buhok. Pagkatapos, hinay ug tugob sa pag-amping nga gituktok niya ang siradong pultahan. Dihang miabli na kini, misugat sa among mga mata ang usa ka lalaki nga dako og lawas. Daw nagdilaab ang mga mata niini nga mitan-aw kanamo.

“Kung si Elsa ang tuyo ninyo, maayo pag manglayas mo!” Sa lalaki pa dayong hubo sa gisul-ob niya’g t-shirt ug mipakita sa dako niyang lawas. “Hapit na ang kasal namo ni Elsa ug dili ko buot nga aduna pay mangulitawo kaniya. Layas namooo!!”

Ug mikaratil dayon mi’g dagan si bay Randy nga dala gihapon ang cake ug ang pula nga rosas! (Kataposan)