Di gyud lalim

Hoy! Ikaw ba! Hunonga na nang pagpanigarilyo!” singka-mando sa sapsing ug daut nga tawong nasugatan ni Abner sa karsada. Gitulisok siya. Kadaghan na ning tawhana masugati ni Abner mabuntag. Di lang kay kalima ka higayon. Wa siya kaila niini. Karon lang ni nitingog niya. Unya pinasingka pa gyud. Nakalitan ug nakurat si Abner.

Sa mga nanglabay’ng higayon nga nagsugat sila, motutok lang pag-ayo niya ang tawo. Bisa’g nag-shades ang tawo, natataw ni Abner ang pagtutok. Kay maglingi pa man gyud niya ang tawo, bisa’g nagkasayloay na sila.

Kada buntag maglakaw lang si Abner ngadto sa iyang trabahoan nga opisina nga mo-isyo og mga tiket sa Lotto. Tigsayo man siya kay siya may  manglimpiyo sa opisina. Unya, samtang maglakaw magpabuhot sa aso sa sigarilyo. Tulo ka kaha mahurot niya sa usa ka adlaw. Usahay manghang na iyang tutunlan. Unya kadaghan na siya magbiyabiya sa maong bisyo. Apan dugay rang usa ka bulan, mobalik na sab og panabako. Nagduda na gani siya nga sigarilyo ang hinungdan nga  siya naupaw. Dugang sa pangidaron kaha kay  nangapo na man siya. Susama ra siya’g lawas ug gitas-on sa iyang kasugat. Piyahok lang ang nawong ni Abner.

“Kinsa man ka? O unsa man ka? Unsa may labot nimo’s akong kinabuhi? Nga gibadlong man ko nimo sa akong pagpanigarilyo?” malaguton sab nga pulong ni Abner. Niurong siya paglakaw. Giatubang ang tawong kasugat, nga niurong sab sa iyang atubangan.

“Usa lang ko ka-concerned citizen, bay!” sa tawo nga nagsul-ob og short  pants nga maong. Nagsapatos og guma. Basa sa singot ang puting T-shirt nga gisul-ob. Piho nga nag-hike og layo. Sa hitsura, daw katalirungan ra sila ni Abner.

“Well, bisa’g unsa nimo ka-concerned, ako ning lawas. Ako ning kinabuhi! Wa kay labot!” ni Abner. Nihikap sa dughan ginamit ang toong palad. Nagsipit gihapon og sigarilyong dinagkutan iyang walang kamot.

“Tinood na. Pero nakahasol ka’s imong isi’g ka tawo. Sama, kanako!” sa tawo.

Ngano god tawong nakahasol ko nimo?” ni Abner.

“Tungod kay nibiya na ko’g panabako. Tulo ka bulan na. Unya kun makakita ko’g tawong nanabako, maglain akong lawas!”

“Unsa may bation nimo?”

“Kapatyunon ko’g tawo!” sa tawo. Nagpamente.

“Kun mao na, balik na lang og panabako. Kay sa makriminal ka,” ni Abner sa malumong pulong.

“Bi. Tagai hinoon ko’g usa ka stick” daling tubag sa tawo. Nikuot dayon si Abner sa kaha sa sigarilyo sa iyang bulsa. Ug gihatagan niya’g usa ka sigarilyo ang tawo.

“Karon lang ni, ha. Basi’g kada  sugat nato, mangayo ka’g sigarilyo. Sunod sugat nato, pagpalit na’g imo” pahimangno ni Abner sa tawo.

Nidawat ang tawo sa sigarilyo. Nidagkot sa kang Abner nga nagsiga. Ug nilakaw nga way tingog tingog. Nakapangawot sa ulo si Abner nga nisunod og tan-aw sa tawo.

“Di gyud lalim ang pagbiya sa sigarilyo,” tuaw niya. (Kataposan)