In-Love - Gula 4

Human nga nakapanghunaw sa nagkabulingit niya nga kamot, diha pa makabantay si Avel nga nagsul-ob diay og mubo kaayo nga short pants si Welyn.

Wala siya makabantay niini kaganina kay mi-concentrate si Avel sa pag-ayo sa sakyanan sa dalaga nga bag-o pa lang niya’ng nakaila.

“Wala ra ba ko makaandam og ma-snack nato Vel, adto na lang ta mangaon sa gawas para ma-road test ‘sab nato ang akong awto,” matud ni Welyn.

Wala na mag-ilis pa si Welyn sa iyang short pants. Si Avel maoy iyang gipa-drive sa awto ug gibilin ra ni Avel ang iyang kotse didto sa parking area ni Welyn.

“Wala na g’yud tuod magtingog no? Maayo g’yud ka nga mekaniko Vel. Pila diay akong bayranan nimo?” matud ni Welyn nga milingi kang Avel nga nagmaneho sa sakyanan.

“Basta ikaw Lyn, anytime nga manginahanglan ka nako, libre ang akong serbisyo,” dali nga tubag ni Avel. “Wow, ka sweet nimo Avel uy,” paraygon na ang tingog ni Welyn nga mihikap pa sa abaga ni Avel. Giingnan ni Welyn si Avel nga adto sila mangaon sa IT Park. Misulod sila sa usa ka kan-anan. Wala damha ni Avel nga ikahimamat niya ang iyang higala nga si Nards.

Iyang gipaila-ila si Welyn ngadto sa higala. Nakapanglingo-lingo si Nards nga pwerteng nakatutok ni Welyn. “Kagwapa gud aning imong kauban bay Avel. Girlfriend ba nimo ni?” hunghong ni Nards ngadto kang Avel.

Igo lang mipahiyom si Avel ug dali kaayo nga mitutok kang Welyn. Nagkaabot ang ilang panan-aw ug sa dalaga. Mibalik si Nards sa iyang lamesa apan nagsige og pasiplat nila ni Avel ug Welyn.

“Nganong wala ka man motingog nga gipangutana sa imong amigo ganina?” pangutana ni Welyn kang Avel. Ang gipasabot sa dalaga mao ang pagpangutana ni Nards kun uyab ba niya si Welyn.

Naghinuktok kadali si Avel. “Kuan man gud, pananglit moingon ko nga dili, tabla ra nga gikauwaw tika, ug moingon ‘sab ko nga uyab ta, wala pa man,” matud ni Avel nga nagngisi.

Mingisi na lang ‘sab si Welyn. “Bitaw, kanindot ba kun magtuo sila nga girlfriend tika Lyn, garbo kaayo ko ana,” dugang ni Avel. Mitutok si Welyn kang Avel.

Nagtinutokay sila’ng duha. “Sigurado ko nga duna ka na g’yuy boyfriend Lyn. Imposible kaayo nga sa imong panagway nga wala kay boyfriend,” ni Avel pa nga pabiling mitutok sa dalaga.

Mipahiyom si Welyn. “Wala ka katag-an. Kausa pa ko makasuway og relationship with a man, pero wala kami magdugay kay bilyako sa tsiks. Akong gibuwagan ug mahadlok na ko nga manguyab. Pero daghan ang nanguyab nako,” matud ni Welyn.  - Sumpayan