Libot sa Rotunda

Nag-jogging na sab ang maanyag ug mestisang dalaga karong buntaga. Nagsul-ob gihapon og T-shirt nga may tatak dapit sa dughan nga mabasa “Tough As Hell.” Naglibutlibot na siya sa rotunda sa Fuente Osmeña. Nag-jogging sab si Bernard. Katulo na niya timbayaha ang dalaga. Apan wa siya panumbalinga. Sama ra sa wa siya nakita ni nadungog sa dalaga. Tigas gyud tingale bayhana. Sama sa tatak sa iyang dughan.

Sa una pa lang niyang pagkakita sa dalaga na-love at first sight dayon si Bernard. Gusto niyang maila-ila ug mahigala ang dalaga. Dili man hinoon maldita o istrikta og hitsura. Maong nakursunada siya. Labi na nga nag-inusara lang ang dalaga sa iyang pag-jogging.

“Hi! Good morning!” ni Bernard dihang gisayloan niya ang mestisa sa unang buntag pagkakita niya. Gituyo gyud niya’g pakusog og dagan aron maapsan niya ang dalaga. Wa nilingi. Wa nitan-aw niya. Sama sa wa siya himatikdi. O invisible man siya sa mata sa babaye. Mao gihapoy nahitabo sa ikaduha ug ikatulong buntag nga pag-jogging ni Bernard nga nitimbaya siya sa mestisa.

Karon, ikaupat na nga buntag. Nangita siya’g paagi. Wala una siya nag-jogging. Nag-hike lang una siya ug nagpaniid. Gipanid-an niya ang dalaga. Kay balig usa ka oras  pa una mopauli ang iyang gipanid-an. Kun moabot na ang kota sa iyang paglibut-libot sa rotunda, mo-hike ang dalaga padulong sa B. Rodriguez. Si Bernard adto pauli sa Kamputhaw, sa dalan Escario.

Gisul-ob niya karong buntaga ang espesyal niyang T-shirt nga pinalit ug gipa-imprintahan og mga pulong. Nigasto gyud siya’g pa-imprinta sa dughan sa iyang puti nga  T-shirt. May tatak na sa dughan iyang T-shirt. Asul ang bulok sa mga litrang dagko. Kay kun karong buntaga, dili gihapon siya tagdon sa babaye, kalimtan na lang niya iyang laraw nga makig-ila-ila niini. Kalimtan na lang niya iyang crush ug kaibog sa mestisa.

Usa ka CPA si Bernard. Bag-o lang nakapasar sa board exams. Tungod kay self-supporting student siya, ug naninguha pag-ayo sa iyang pagtoon aron makalampos, wa siya’y seryosong relasyon sa babaye. Pagkatinood, wa pa gyud siya‘y naibgan. Karon pa lang siya nibati og grabeng kaibog.

Clockwise ang rota sa jogging sa dalaga. Kaniadto, iya lang gisundan. Karon iyang sugaton. Maoy laraw niya. Counter clockwise iyang buhaton nga pag-jogging libot sa rotunda.

“Hi! Good morning!” ni Bernard, dihang duha ka dupa na ang dalaga sa iyang atubangan. Nitutok ang dalaga sa dughan ni Bernard. Niurong sa pag-jogging. Nipahiyom. Nisaylo si Bernard. Apan niurong. Ug niliso kay niatubang sab ang mestisa niya. Nanighawak. Nikuba pag-ayo ang dughan ni Bernard. Nibahakhak ang babaye. “Ha ha ha ha ha!”Nitudlo sa dughan ni Bernard.

“You’re my opposite!” sa dalaga. Mapahiyumon na.

“If you are tough as hell, I am soft as heaven” ni Bernard sa malumo nga pulong. Nagpahiyom. Gitudlo niya ang mga tatak sa iyang dughan. Ang tatak mabasa nga “Soft As Heaven”.

“I admire your resourcefulness. You really caught my attention” sa dalaga.

Mapasalamaton si Bernard sa iyang swerte.

“Thank you, Miss...” ni Bernard.

“Aghat, Cathy Aghat” sa dalaga.

“I’m Bernard Batilos. It’s a pleasure meeting you,” ni Bernard. Nagpahiyom nga nagtunol sa tuong kamot.

“Me, too,” ni Cathy. Nidawat sa kamot, nilamano sa ulitawo. Mapahiyumon sab nga mitutok ni Bernard nga macho ug husto’s barog.

“Can I invite you to a coffee break,” ni Bernard. Nitudlo sa Shamrock Cafe.

“Good idea,” sa dalaga. Ug naglumba sila’g jogging padulong sa Shamrock Coffee. Hilom nga nihangad si Bernard sa langit sa iyang dakong pasalamat. Soft as heaven man gyud siya tinuod. (Katapusan)