In-Love Gula 2

Migawas si Avel gikan sa iyang kotse nga diha ra tupad sa awto sa gwapa nga babaye nga iyang nahimamat didto sa party.

“Wala moandar miss?” gipangutana niya ang babaye. “Wala lagi. Maayo pa man ni ganina karon dili na man moandar, nahutdan na lang hinoon sa power ang battery,” sa babaye pa.

“Sige tabangan tika. Tangtangon nato ang battery sa imong car ug ipuli nako ang battery sa akong sakyanan kay heavy duty man ni,” matud ni Avel nga mitutok sa babaye.

Wala na maghuwat si Avel nga motangdo ang babaye. Gibuksan niya ang baggage compartment sa iyang kotse ug mikuha siya’g tools nga magamit pagtangtang sa battery sa sakyanan sa babaye.

“Salamat daan sa imong pagtabang ha? Ako diay si Welyn ug kining akong kauban si Raquel,” matud ni Welyn nga mitudlo sa babaye nga migawas gikan sa passenger seat.

Mipahiyom si Avel ug mipaila usab sa iyang kaugalingon. Gipuli ni Avel pagtaud ang battery sa iyang sakyanan ngadto sa sakyanan ni Welyn. “Sige try og start, siyaro’g dili moandar nga kusog kaayo ning akong battery.”

Daw milupad ang starter sa sakyanan ni Welyn sa kakusog mituyok ug giabagan dayon ni Avel, gi-choke niya ang karburador sa kotse. Wala diay dayon makasaka ang gasolina mao nga dugay’ng miandar.

Sa kataposan, napaandar ni Avel ang kotse ni Welyn. Migawas si Welyn gikan sa kotse. “Hala uy, salamat g’yud kaayo. Pilay akong bayranan nimo Avel?” matud sa nagpahiyom nga si Welyn.

“Bayad gud tawon. Alang nako, ang bayad mao nga nagkaila ta kay ganina pa ko nga gustong makig-ila-ila nimo,” ni Avel pa. “Mao ba? Unya ngano nga wala ka man makig-ila-ila nako didto sa party?” daling tubag ni Welyn.

Mipahiyom si Avel. “Mauwaw ko kay gwapa ka man gud.” Si Welyn maoy unang nangayo sa contact numbers ni Avel. Nagbayloay sila og mga contact numbers. Human ikabalik ni Avel ang battery ni Welyn, nanghunaw siya sa mineral water nga diha sa iyang sakyanan.

“Mas maayo nga dili nimo dayon pagngon ang makina Lyn kay aron mo-charge g’yud pag-ayo ang imong battery. Wala kanay problema kay gipakusgan nako’g gamay ang imong menor,” ni Avel pa.

Pwerte nga nakatutok ni Avel sa maanyag nga panagway ni Welyn, ilabi na sa maanindot kaayo niining mga ngabil ug sa nindot kaayo nga pilok.

“Sige Avel, magkontak-kontak lang ta ha?” matud sa mapahiyumon nga si Welyn. Una nga migawas si Welyn gikan sa parking area. Gisunod usab ni Avel ang sakyanan ni Welyn apan nagpalayo ra siya. - Sumpayan