Dili pul-an sa tsiks Gula 7

Nagngisi si Felipe dihang gisukna siya ni Darwin kun unsay gisangpotan sa panagdeyt nila ni Chona. Sanglit diha man ang ubang reporters nga makabati, gihunghong ni Felip ngadto ni Darwin ang iyang kasinatian. Nagkataw-anay ang duha ka reporters.

Pagka-udto, nagdungan og pangaon sila si Felipe ug Darwin. Ilang giuban si Elly, kauban nila nga reporter. Nanulod sila sa usa ka fast food dili layo sa City Hall ug miorder si Felipe sa ilang makaon.

Didto na nagpaabot sa lamesa sila si Elly ug Darwin. Gilantaw nila si Felipe nga pwerteng dugaya nakabiya sa counter kay nagsigi diay og pakigsulti sa cashier. Wala na makaantos si Elly. “Sugta na tawon na day kay gigutom na mi.”

Nagngisi si Felip sa duha niya ka higala. “Buanga bro misugot si Janet kanang cashier nga kuhaon nako siya unyang gabii inig off niya,” matud ni Felipe. Pwerte nga nakakatawa ni Elly. “Dili ka g’yud pul-an sa tsiks no?”

“Ambot bitaw bro, wala g’yuy sum-ol nako ang tsiks. Bahala’g kapoy sa trabaho pero malagsik ko basta tsiks na. Aw sigi man ‘sab ko’g inum sa tambal pangpalagsik,” ni Felip.

Pagka gabii, wala pa gani manirado ang gitrabahoan ni Janet, didto na sa atbang si Felipe nagpaantaw nang daan. Tuod, nagkuyog sila si Felip ug Janet. “Kuyugi ko Felip sa balay sa akong classmate niadto kay birthday niya,” ni Janet.

Sa birthday party, napugos si Janet pag-inum og beer uban sa mga barkada. Dali ra g’yud kining nahubog sa iyang nainum. Hapit na alas dose sa gabii nga namiya sila ug nagsumparay na si Janet.

“Mauwaw ko mopauli sa boarding house uy nga nakainum,” giingnan ni Janet si Felipe. “Aw unya, asa man ta matulog?” abtik kaayo nga nakasakay sa panahon ang tsikboy nga si Felipe.

Wala motingog si Janet nga migunit sa bukton ni Felipe. Nasabtan ni Felipe nga nalipong si Janet. Gipara ni Felipe ang nagsingabot nga taksi. “Q-6 ta bai,” giingnan ni Felip ang drayber.

Dali ra silang miabot sa Q6, usa ka motel sa General Maxilom Avenue. “Unsa man ning gidad-an nimo nako Felip? Motel ni no?” nakapangutana si Janet. “Ay, mamahuway ra gud ta, ayaw lang kahadlok,” ni Felipe.

Apan wala makalikay sa tentasyon si Felipe kay gidaug siya sa kaibog ni Janet. Wala usab makabalibad si Janet nga gihakop pa sa gahum sa iyang nainum. Nasuta ni Felip nga dili na siya ang nakauna kang Janet.

Human sa ilang pagparayganay, nahuwasan si Janet. Pwerte kini nga nakahilak nga nagmahay sa iyang gidangatan. Nalooy kaayo si Felipe nga nagsud-ong kang Janet. Diha pa siya makaamgo nga dili maayo ang pagpahimulos sa kababayen-an. - Kataposan