Monyeka

Napahunong si Jeny sa pultahan sa iyang balay sa eskuwater, dihang maoy nasawod sa iyang pandungog nga may gikasulti ang 6 anyos niyang anak babaye nga si Chinchin ning udtoha. Gikan pa siya nga nangobra sa suholan sa mga suking nagpalabada niya ning ilang dapit sa eskuwater dinhi sa siyudad. Labandera ang panginabuhian ni Jeny.

Larino kaayo  ang sinultihan ni Chinchin nga klarong nabati ni Jeny didto sa sulod sa hawanan. Kuryuso nga naminaw si Jeny sa panagsulti sa iyang anak ug sa kauban niini didto sa sulod sa balay.

“Hala! Nindota ining monyeka, uy! Mao ning monyekaha nga ako untang ipapalit ni Mama Jeny! Apan wa may kuwarta si Mama! Salamat ning Barbie nga monyeka, ha...?”

“Naluoy man gud ming mga duwende nimo ug sa imong Mama nga labandera nga nag-antos sa kalisod! Hibawo mi nga dugay na kang nangandoy nga makaangkon og monyeka nga Barbie. Mao nga gihatagan tika, Chin!”

“Duwende diay ka? Gamitoy diay kaayo mong mga duwende?Asa man mo magpuyo nga mga duwende?”

“Tawga lang ko’g Dwarpina! Katalirungan ko nimo, Chin! Bugtong kong anak babaye nilang Papa ug Mama kong mga duwende. Naa mi magpuyo sa ilawom sa inyong silong...!”

“H-ha? Ilawom sa among silong....?”

“Oo! Kanang bungdo nga nagtuybo sa inyong silong, mao ang among balay! Nagpasalamat sila si Papa ug Mama nga wala ninyo pataga ang maong bungdo sa pagtukod ning inyong balay!

Mao nga gisugo ko nila nga makig-amiga nimo, Chin ug sa imong Mama...!”

“Aw, balay diay ninyo kanang nagtuybo nga yuta sa among silong, Dwarpina...?”

“Oo! Nagkasabot ang kaubanang mga duwende nilang Papa  ug Mama nga tabangan mo sa imong Mama Jeny, aron mahaw-as mos kakabos!”

“Nindota god! Lipay na man lang ko nga gihatagan ko nimo ning monyekang Barbie...!”

“Magic monyeka kanang gihatag ko nimo, Chin! Dunay siper kining monyeka sa kilid sa iyang lawas.

Matag kinsenas ug tapos sa bulan, inig-abli ninyo ni Mama mo sa siper ning monyeka, anaa sa sulod ang tuskig nga kinse mil pesos nga papel-de-banko matag kinsena ug tapos sa bulan!

Sa ato pa, trayenta mil pesos ang inyong makuhang kuwarta sa usa ka bulan! Ug karon, kay atol man sa kinsenas, anaa na sa sulod sa monyeka ang kinse mil pesos nga papel-de-banko...!”

“Yippeeee! Makapahulay na gayud diay si Mama Jeny sa pagpanglabada!” nakasinggit sa tumang kalipay si Chinchin.

“Oo, Chin! Basta sultihi lang gyud si Mama mo nga ampingi ug amumaha gayud ninyo ang bungdo ilawom sa inyong silong, ha? Sige, adto na ko, Chin! Magkita lang unya ta...!”

Nakapanglingo si Jeny nga kaganina ra diay miabli og diyutay sa pultahan sa iyang balay ug nakita gayud niya ang duwende nga na-amiga sa iyang anak.

Malipayon nga misulod si Jeny sa hawanan sa ilang balay nga nagsud-ong kang Chinchin nga malipayon usab nga nagdula sa matahom niyang monyeka-ang magic monyeka nga makahaw-as na gayud sa ilang kakabos uban sa iyang anak nga bunga sa iyang pagka-disgrasyada!