Magdalena - Gula 184

“Matud ni Dodong, Ma, nga madugay pa siya sa pagpauli kay gipadala siya sa usa ka mission area sa Surigao,” matud ko.

“Ah, si Dodong diay. Apan nganong wala ka may gisulti kanamo ni papa mo kun naunsa na ang imong igsuon?” ni mama pa.

“Abi man nako, Ma, og magsige mo’g estorya sa text maong wa na lang ko mosulti ninyo.” Dali ra nakong nakabunlot ug itubag ni mama.

Kalit miduaw ang kahilom taliwala kanamo nga nangaon. Ug ang tingog na lang sa kutsara nga mosangko sa plato ang mabati.

“Nganong wa na man nimo duawa, Maria, ang imong balay sa Ginatilan?” Adtoa sab to panagsa, namulong si  papa Juan. “Tingali unya’g magabok na kadto.”

“Husto, Pa, nakalimtan na man nako nga aduna koy balay sa Ginatilan.”

Sa gisulti ni Papa iya kong gihatagan og bag-ong venue. Puydeng mao na usab kini ang akong himuong laing rason aron molakaw ug magkita kami si Bob.

Akong gipahibalo si Bob sa akong nahunahunaan.

“Mao ba! Wow! Mora’g musamot gyud ta og enjoy, da. Kay puyde na tang mag-overnight didto,” nagkanayon si Bob.

Ang akong balay sa Ginatilan maoy nahimong bag-ong tagboanan namo ni Bob. Hilit ang maong dapit. Wala gyu’y kasugawnan bisan unsa pay buhaton namo ni Bob didto.

Pinaagi sa text, kadali ra ming magkasabot ni Bob nga magkita aron moadto sa Ginatilan. Ug sa higayon nga magtagbo mi didto tagbawon gyud namo ang among kaugalingon pagtagay sa lawasnong kalipay. Subli-sublion namo pagkatkat ang kinatumyan sa langit. -- Sumpayan pa