Ang palahubog

Buntag. Sama sa naandan, nia na sab si Ronie sa sarisari store nga  nahimutang sa daplin sa karsada aron modimdim na sab sa paborito niyang bino ug ang pagpamisita sa tindera ug tag-iya nga si Elsie. Sa pangidaron nga 61-anyos, pwera buyag, hilig pa sa babaye si Ronie.

Biyudo na siya ug nag-inusara na lamang sa ilang balay kay nangaminyo na man ang tulo niya ka mga anak. May pension siya nga madawat matag bulan nga maoy iyang gisaligan sa iyang pagkaon ug lakip na sa iyang bisyo nga mao ang pag-inom og bino. Usa siya ka reteradong sundalo!Sukad nga gikahimamat ug gikaila ni Ronie si Elsie nga usa sab ka biyuda, adto na gyud siya sa tindahan niini magyampungad. Nadani man gud siya kang Elsie tungod kay bisan sa pangidaron niini nga mikabat na sa 52-anyos seksi pa man kaayo kini ug bigot pa ang panglawas.

Dihang nakalingkod na si Ronie sa taas nga lingkoranan nga ang pikas tumoy gilingkoran sab ni Elsie, misugod dayon siya’g arangka.

“K-Kanus-a pa man ko nimo sugta, day Els, unya na ba kung mohunong na sa pagpitik ang akong kasingkasing?” ni Ronie pa dayong  yarok sa bino nga gisulod sa baso.

Nangigham si Elsie. Unya, “Sama nimo, Ron, nangandoy baya sab ko’g ikauban sa kinabuhi. Apan kun sugton tika, makahimo ka kaha sa akong idili nimo?”

“Bisa’g unsa pay idili nimo nako, day Els, buhaton gyud na nako tungod ug alang sa akong gugma nimo!” ni Ronie pa nga nagpanglad-ok sa iyang laway nga nakapasiplat sa puti nga paa ni Elsie nga miamag sa gisul-ob niining short nga maong.

“S-Sugta na tawon ko, Day Els, maluoy tawon ka nako!” nangamuyo na sab siya.

“Sige, sugton tika karon dayon basta isaad mong undangon mo na ang pag-inom og bino!” Wala’y lipud-lipod nga namulong si Elsie.

“Haaaa!!!” Nakalitan si Ronie ug kalit kining mibarog tapos mabati ang gipamulong ni Elsie. Unya, a-apan d-day Els, mao ra gyud kini ang akong kalipay ... ang pag-inom sa paborito nakong bino!”

“Pauli lang una, Ron ug balik lang kung mahimo mo na ang akong gidili nimo....” ni Elsie pa dayong kab-ot sa basiyo nga botelya  ug baso.

“Dili na man gud ko gusto’g lalaki nga kusog moinom og bino kay ang pagkapalahubog man gud maoy namatyan sa kanhi nakong bana!”.

“O, sige ... tungod ug alang sa dako kong gugma nimo, day Elsie, moundang na ko sa pag-inom og bino!” ni Ronie pa dayong tudlo sa beer, “k-kana na lay akong imnon!”

Dihadiha misutoy og lakaw si Elsie nga walay tingog ug gisirad-an dayon niini pagbalik ang tindahan. Ug naamgohan ni Ronie nga niining  higayona, lain na sab nga kapakyasan sa gugma ang iyang nahiagoman tungod sa iyang pagkapalahubog! (Kataposan)