Prof. Tata Swami

Hello Prof. Tata,

Good day! Hope you're always fine. Mangayo ko og meaning aning akong damgo nga magsige og balik2x . Nagsugod ni sa nag edad pa ko ug 40+ ug hangtod karon 53 na ko mao gihapong klaseha sa damgo. Sa akong damgo kanunay lang ko ma problema kay mawala akong motorcycle, mawala ang cellphone, mawala ang tsinelas ug akong karsones ug kanunay ko masaag or malipat sa agianan, dili nako katoltol sa akong paulian ug ang tanan nga tawo nga naa sa akong damgo dili nako kaila ug wala gyu’y makatug-an ug nakabantay sa mawala nako nga mga butang. Unya kini adto sa mga layo nga lugar nga wala pa nako naadtuan. Pero dili ni dungan nakong gi damgo, mao lang ni ang mag puli-puli sa matag damgo nako. 

Salamat and more power.  — Virgilio

Virgilio,

Ingon man ka nga dili dungan ni imong damgo, pasabot nga lahi ang mga panghitabo. Maayo unta to kung gitagsa-tagsa nimo og estorya ang mga panghitabo ani imong mga damgo. Pero ako lang gihapon ning hubaron sumala sa imong pagsaysay pero timan-i nga possible nga malahi ang kahulugan kung lahi ang scenario sa imong damgo ok?

Kining magdamgo na gani kag mawagtang ang motorcycle, nagpasabot nga ang kalangan sa imong gipaabot, maputol na, pasabot nga maabot na gyud intawon ang imong dugay nang giampo nga motunga sa imong atubangan. Pero timan-i akong giingon nga depende gyud ni sa dagan sa imong damgo.

Kung mawagtang imong cellphone sa imong damgo nagpasabot nga matarong na ang away nga panghitabo sa imong kinabuhi. Kung naa man gani kay kaaway sa panahon sa imong pagdamgo, magkauli na inyong maayong buot.

Mawagtang ang tsinelas ug karsones, kung nang-apply ka para makalarga sa laing nasod,  naa pay mga kakulian. Kung sa sunod nimong damgo, imo nang plantsahon ang imong nawagtang nga karsones ug makit-an na ang nawagtang nga tsinelas, makalarga na ka!

Ang katapusan mong damgo nga kanunay kang masaag, malipat ug dili na katoltol, ug wa ka kaila sa mga tawo, nagpasabot nga daghan ang mo-distract o’ maoy rason nga mosimang ang mga panghitabo, imbis nga padung sa imong mga plano nga molarga ba ka ron, pero naay mga kakulian, kasamok, away, kaligutgot o’ uban pang mga panghitabo nga makapawagtang sa imong concentration o’ makapausab sa imong mga desisyon.

Kini imong damgo noh, usa ra gyud ang kinahanglan ani aron matuman ang imong mga gipaabot o’ matuman na gyud intawon ang imong mga giplano. Nagkinahanglan ka’g hugot ug kinasingkasing nga mga pag-ampo. Nganong wa may tawo imong kaila sa imong damgo? Ug nganong wala’y makatug-an sa nawala mong mga butang? Kay dili man tawo ang makatubag, kun dili, ang Ginoo! Mao na ang mensahe sa imong damgo. hugti gyud ang imong faith sa Ginoo aron matuman ang imong mga gipangandoy sa kinabuhi. Sa akong permi giingon, hangyo sa Inahan ni Jesus, si Mama Mary, aron dali maabot atong gipaabot, kay maglisod og balibad ang anak kung ang inahan na ang mohangyo. <wink>.

Amping!

Prof. Tata Swami

D' Swami (Descendant of Professor Swami) Facebook page: https://www.facebook.com/BeyonddreamsBYdswami Group page: https://www.facebook.com/groups/beyonddreams.swami/

* **

Atangi ang Hubad sa Damgo matag Miyerkules ug Sabado dinhi lamang sa Banat News. Alang sa inyong pangutana kabahin sa kahulogan sa inyong damgo, ipadala kana ni Tata pinaagi sa: [email protected].