Babaye gipanglili

Mihilak ug mitalikud si Karlyn kang Noel dihang nasayran niya nga gilili siya sa jailguard dihang misulod siya sa city jail. Padayon nga mialam-alam si Noel sa dalaga. Sori kaayo Karlyn ha? Ayaw hatagi og gibug-aton nga gilili tika adtong pagsulod nimo sa city jail. Abi nimo, kadto maoy naghatag og dalan nga mahigugma ko kanimo Karlyn,” matud ni Noel. Wala magtingog si Karlyn ug nakabantay si Noel nga miginhawa kini’g lawom. “I love you Karlyn. Nasayud ko nga buotan ka ug kini maoy gipangita ko sa usa ka babaye,” dugang ni Noel.

Taud-taud mora’g mihunas na ang mga bakho ni Karlyn. Mibalhin sila paglingkud didto sa suok nga bahin sa fast food store nga wala kaayo’y mga customer nga nanglingkod.

Taud-taud, gihatud na ang giorder nila nga pagkaon. “Sigi, mangaon na ta Karlyn.” Gikan niadto nga nakapadayag na si Noel sa iyang gibati kang Karlyn, mora’g girlfriend na ang iyang pagtagad sa dalaga.

Gikuot ni Noel ang panyo niya gikan sa iyang bulsa  ug gipahiran ang nahabiling mga luha ni Karlyn nga namilit sa iyang kaapingan. Wala maglihok si Karlyn samtang gipahiran ni Noel ang iyang nawong.

Mitutok si Karlyn kang Noel. “Mauwaw g’yud ko nga maghuna-huna nga nakita na diay nimo ang kinatibuk-an sa akong lawas dihang imo ko nga gibuso.”Mipahiyom si Noel ngadto sa dalaga. “Ayaw kana og huna-hunaa Karlyn kay ingon niana man gayud ang mahitabo kun mahimo ko na ikaw nga girlfriend ug asawa.”

Wala tuyoa nga nakapahiyom si Karlyn nga nakadungog ni Noel. Gipiyong ni Karlyn ang iyang mga mata. “Sigi, magpa-patay-mali na lang ko nga mora kunohay og wala masayud nga nabuso na diay nimo.” Nangaon sila si Karlyn. Human sila makakaon. “Bisitahan nato si nong Vic didto sa city jail,” giingnan ni Noel si Karlyn. “Dili ko uy kay lain na ‘sab unya nga gwardya ang mobuso nako,” dali nga tubag ni Karlyn nga nagngisi na. “Dili na tika iparekisa. Ako na’y modupa nimo nga pasudlon ka lang nga dili na rekisahon,” matud ni Noel. Tuod, nakabisita gayud si Karlyn sa iyang amahan.

Nakabantay ang amahan ni Karlyn nga may relasyon na ang iyang anak ug si Noel. “Ikaw na’y bahala sa akong anak sir ha, ayaw baya tawon siya’g binuangi.”

“Dili g’yud nong Vic. Kun mosugot si Karlyn nako, maimo na ko nga umagad kay pangasaw-on man nako siya,” matud ni Noel nga wala mauwaw mitug-an nga nakagusto siya sa anak sa piniriso.

“Wala ka’y problema Karlyn kun si Noel ang imong mabana kay dugay-dugay na man ko nga nabilanggo dinhi, nakita naku nga buotan g’yud siya,” dason ni Vic. -- Sumpayan