Komusta n kaha ang biyuda?

Nagtaligsik pa, samtang hangtod niining mga gutloa, wa pa gyod ko makahukom. Kun unsay buhaton alang sa ika-40 diyas sa kamatayon sa akong asawa nga si Alicia. Nangutana na ang akong mga paryente. Ang duha nako ka mga anak, ang doctor nga tua sa Chicago, ug ang nurse nga tua sa Canada. Nagpadala na sa igong kantidad, alang sa kasaulogan sa ika kwarenta ka adlaw sa kamatayon sa ilang inahan. Dili na sila mamauli.

Pero moduha na ka oras nakong lingkod niining tuwang tuwang [rocking chair] nga lingkoranan duol sa bentana, wa pa gyod ko makahukom sa matang sa pagsaulog ang himoon. Kay samtang nagtan-aw ko sa bulkan sa Kanlaon, nga makita gikan sa akong nahimutangan, mamalik gyod ang nanglabay’ng panahon. Taga Kanlaon man god si Aurora, ang babag unta sa kasal namo ni Alicia.

Gikaila nako si Aurora sa gipuy-an nako niadtong nagtungha pa ko sa abogasiya. Mihapit ko sa maong lodging house gikan ko sa oath taking, sa pagkapasar nako sa bar. Bisita usab si Aurora sa kanhi landlady nako. Kay komare diay niya ang tag-iya.

Biyuda siya. Misalikyat usab siya sa balay sa iyang komare, kay dunay gihikay’ng mga papeles sa iyang banang huwes nga dili pa dugay’ng namatay. Nagtupad ang among kwarto.

Nagka-estoryahanay mi. Gibati ko’g paghigugma. Gihikap nako ang iyang mga kamot. Miabot ang akong mga kamot sa iyang paa. Dili unta siya mosugot, ug misulod siya sa iyang kuwarto, pero akong gisunod. Akong gihagkan, gigakos ug giabli ang zipper sa likod sa iyang sinina hangtod nga nahubo ang sinina.

Gipahigda nako siya, ug naghubo usab ako. Nalimot ko, nga duna na usab ako’y pangasaw-onon. Gisaaran nako si Aurora nga pakaslan nako siya.Apan sa pagpauli nako, andam na ang among kasal ni Alicia. Wa na ko magpakita ni Aurora. Wa na ko masayod hain siya.

 Karong biyudo na pod ko, gihandom nako ang biyuda. Komusta na kaha siya? Ahh! Naglabad na gyod ang akong ulo. (Kataposan)