Lord, pasagdi una ko

Kinse anyos pa si Rex niadtong panahona nga namatikdan nako ang lahi ug kamadanihon sa iyang kaambongan. Bisan sa kalinghod pa sa iyang pangidaron, nadani gyod ko niya, pero daw idlas ma-uwawon o ba kaha, garbosohon, hinungdan, nga wa gyod ko mosuway usab, sa pagdani kaniya.

Ug miligid ang mga katuigan. Nakahuman siya sa high school, pero daw nawaa na lang usab ang akong dakong gusto niya. Labi na, kay diha na man pod koy nahimong karelasyon, nga ig-agaw ra pod niya ug ambongan usab.

Milabay na usab ang pila ka mga tuig. Naminyo ang akong gika relasyon, nga bisa’g sakit palandongon, akong gidawat sa maayong kabubut-on. Kay lagi, wa may balaod dinhi sa Pilipinas, nga magkaminyo ang duha ka lalaki. Gidawat usab nako ang kamatuoran, nga babaye gyod ang gusto sa usa ka lalaki.

Gawas nga naminyo ang ig-agaw ni Rex, hasta usab si Rex, naminyo. Apan kay wa lagi makahuman sa College, ang trabaho nga masudlan igo ra gyod sa pagka contractual. Hinungdan, nga bisa’g dunay klarong trabaho ang iyang asawa, si Rex nagkinahanglan gyod sa dugang nga income.

Hinungdan, nga niining higayona, nga bakante pod ko, bisa’g may pangidaron na, mibalik ang interes nako ngadto niya.

Gisuwayan nako ang naandan  nakong taktika sa pagdani sa usa ka lalaki, ug wa damha nga mitukob siya sa akong pa-on.

Busa si Rex na karon maoy akong karelasyon. Pero minyo usab si Rex. Busa nasayod kong dili gyod magdugay kining relasyona, Pero sa pagka karon, kay nasayod man ko, nga dakong supak kini sa Kahitas-an, matag ampo nako, sa dayon nakong pagkatulog, moingon ra ko, “Lord, pasagdi lang una ko, please..” Kay matapos ra ni. Hangtod kanus-a, ikaw ra sad Lord ang nasayod. (Kataposan)