Masahesta ug Drayber - Gula 7

Napikal kaayo si Rico sa drayber nga wala gayud motug-an kun kinsa ang babaye nga misakay sa kotse. Nakahigayon si Rico pagpangutana sa katabang-babaye sa balay nga misugat ug miabli sa gate.

Natingala ang katabang kun nganong nangutana si Rico kinsa ang babaye nga nagsakay sa luyo sa awto nga unta kauban man sila sa biyahe mao nga iyang natug-anan nga ang agawon niya nga si Fe ang nanaug.

Misamot og kalibog ang huna-huna ni Rico. Wala siya makasabot nganong gililong ni Fe nga kauban sila kaganina. Didto ra si Rico mihigda sa silya nga tuwang-tuwang sa kayda sa panimalay.

Nagpatoo siya nga nakatulog apan layo kaayo ang iyang kaisipan sa paghuna-huna. Taud-taud, nakadungog siya’g tingog nga mora’g nagparayganay didto sa pikas bahin sa kayda.

“Gilok kaayo na uy. Mamat-an gani kita ni Rico ikaw lang,” matud sa tingog sa babaye nga kabisado kaayo ni Rico nga iya ni Fe. Gikulbaan siya sa iyang nadungog. “Layo ra to siya, tua sa atbang unya dili kana makakita kanato kay buta,” matud sa lalaki.

Sigurado si Rico nga drayber ni Fe ang maong lalaki. “Kun mao, may relasyon si Fe ug ang iyang drayber,” ni Rico pa sa iyang huna-huna. “Tana, mamalhin ta sa kuwarto ninyo,” matud sa drayber.

“Kun makamata si Rico?” mabalak-on nga tingog ni Fe. “Ako ra’y bahala kun mosulod siya sa inyong kwarto, lipaton ra nako siya. Tana!,” matud sa drayber.

Wala makasabot si Rico sa iyang gibati. Karon nasayud na siya nga gibudhian siya sa iyang asawa ug ang ilang drayber maoy iyang gikarelasyon. Iyang gitimbang-timbang nga nahimo kini sa iyang asawa kay dili na siya makahatag sa iyang gikinahanglan.

“Dia ka ra lagi dinhi sa gawas Nong Ric?” matud sa katabang nga nakapapugwat ni Rico. May nahuna-hunaan si Rico.

“Dili na ko mosulod sa among kwarto ni Ma’am nimo day, gikan karon mobiya na ko dinhi. Ipalihug ko ni Ma’am nimo sa pag-ingon nga mipauli na si Rico ug nga dili na gayud mobalik pa dinhi,” matud ni Rico.

“May nabantayan ka Nong Ric?” pangutana sa katabang. Wala na motubag si Rico sa katabang ug mihinay siya pagkuha sa iyang sungkod ug mipaingon sa gate.

Pagka ugma, Domingo, “with feelings” kaayo si Rico nga mikanta sa mga awit sa simbahan. Diha sa iyang dughan ang kahaw-ang ug kaguol. Wala siya masayud nga sa unahan may mga mata nga nagtutok kaniya nga puno sa pagmahay.

Human sa misa. “Nong Ric makigsulti kuno nimo ang imong asawa,” matud sa sakristan. Milakaw si Rico nga daw walay nadungog, ang iyang kasing-kasing nalumos sa kapakyasan sa gugma. - Kataposan