Masahesta ug Drayber

Gula 5

Usa ka gabii sa panagtupad og higda nila ni Rico ug Fe, nakabantay ang masahesta nga gusto og kumbati sa kama ang iyang asawa.

Apan mora’g wala sa kondisyon si Rico kay kaganina ra niya nga gusto’ng patindugon si Junior apan nagsige lang kini og ligid nga daw gikapoy.

Si Fe na gani maoy nangunay pagpukaw ni Junior, apan igo lang mitimbakuwas og gamay, dayon miuk-ok lang ‘sab dayon. Mora’g nauwaw si Rico kay nasabtan ra ba niya nga hot na kaayo si Fe.

Ang sama nga sitwasyon nasundan pa og laing mga higayon. Diha’y higayon gani nga diha na sila sa taliwala sa pagparayganay ug gusto na gayud unta ni Fe nga katkaton na nila ang bungtod sa kalipay.

Dili matukib sa pulong ang kauwaw ni Rico dihang mikalit lang og ka “lowbat” ang iyang Junior. “Naunsa ka na man Ric, sige na man lang ni nako nga nabantayan. Wala ka na’y gana nako?” gisukna na g’yud si Rico ni Fe.

Wala gayud makatubag si Rico, igo lang niya nga gipaak ang kaugalingon niya’ng ngabil ug sa hilom gipaningkamotan nga makabarug pa pagbalik si Junior, apan wala na g’yud.

“Pahuway usa Rico, undang usa anang sige nimo’g masahe kay basin kana maoy nakaingon nga wala ka na’y power,” giingnan ni Fe si Rico.

Gituman tuod ni Rico ang gisulti kaniya ni Fe. Gipalitan pa gayud siya ni Fe og mga bitamina nga pangpalagsik apan milabay na lang ang duha ka semana wala’y epekto.

Nakamatikod si Rico nga wala na lang ‘sab mamugos pa ang iyang kapuyo. Mibalik na lang si Rico sa naandan niya nga pagmasahe. Usahay ihatud siya ni Fe, ug may mga higayon ‘sab nga ihatud ra siya sa drayber ni Fe ug kuhaon lang taud-taud.

Dihay higayon nga gihatud si Rico sa drayber sa iyang customer nga masahean usa ka buntag niana. Sa dayon na’ng tak-up ni Rico sa pultahan nakadungog g’yud siya nga may tingog sa babaye gikan sa gisakyan niya nga kotse ni Fe.

Naglibog si Rico kay sila ra man ug ang drayber ang sakay sa sakyanan... nagpabilin ra man si Fe sigun sa iyang pananghid.

Aron pagtin-aw sa kalibog, gipangutana ni Rico ang katabang-babaye sa iyang customer nga misugat kaniya kaganina sa gate.

Gisukna ni Rico kun duna ba’y babaye nga sakay sa kotse nga iyang gisakyan. “Diha may babaye nga naglingkud sa luyo nga lingkoranan Nong Ric,” matud sa katabang.

Nahingangha si Rico ug misamot ang iyang kalibog. - Sumpayan