Dili ihatag

Dear Tita Salie,

Have a nice day. Just call me Jestoni, I’m single and my problem is about my lovelife and my girlfriend.

Nanobra ang akong love niining akong girlfriend, Tita, kay bisan unsay iyang gusto ako man gyud nga paningkamotan aron akong mahatag. Ug sa akong tan-aw mora’g love pud ko niya apan nigawas lang ang akong pagduda nga dili ko niya mahal ug wala siya’y salig kanako tungod sa usa ka panghitabo tali kanamo.

Ako man gud nga nasayran, Tita, nga dili na virgin ang akong hinigugma. Mora’g nahugno ko dihang iya kining gisulti kay siya man gyud mismo ang mitug-an sa kamatuoran. Pero matud niya nga dili pud niya basta-bastang ihatag ang iyang pagkababaye, matud niya nga depende kini sa lalaki.

Niingon pa siya nga bisan kanako nga iyang uyab dili daw niya ihatag kanako ang iyang pagkababaye. Dili gyod kuno siya  magpagamit kanako, Tita.

Nangluod ko kay wala man siya’y salig kanako. Busa makaingon usab  ako nga basin kun wala siya mahigugma kanako. Unsa may akong buhaton? Palihog pasabta ko. Thank you so much and more power.

* * *

Hello, Jestoni,

Ayaw pangluod sa iyang gisulti, dapat hinuon ma-challenge ka tungod kay dili pa siya kontento sa imong gipakita kaniya nga pagbinuotan. Gi-challenge ka niya ug tinuod ang imong gugma kaniya dawata ang maong hagit ug ipakita kaniya nga dapat sab diay mosalig siya kanimo. Buot ipasabot niini nga kulang pa ang imong gipakita kaniya. So, dugangi pa ang imong gibuhat dili tungod aron ihatag niya kanimo ang iyang pagka-babaye kun dili aron mamahimo siyang at home diha kanimo. Aron siya makapahimutang na sa iyang gugma ug kaugalingon diha kanimo tungod kay may pagsalig na man siya.

Ang gisulti sa imong girlfriend nagtimaan nga taas-taas ang iyang standard ug dili siya basta-basta nga mosalig sa laing tawo seguro nahitabo lang nga ang iyang unang uyab maayo lang kaayo mobulatik ug nadala gyod seguro siya. Nailad seguro siya sa iyang unang hinigugma hinungdan nga iyang nahatag ang iyang kaugalingon.

Dawata ang iyang hagit kay dinhi usab nimo masukod ang iyang tinuod nga kinaiya, ug kun tinuod ba gyud ang iyang gugma kanimo. And at the same time dinhi usab nimo mailhan ang imong kaugalingon kun hangtud asa kutob ang imong makayang buhaton. Hangtod asa kutob ang imong pasensya nga ikahatag niining bayhana. -- Tita Salie