Panagtakdo sa pagbati

Sama sa naandan na, pagkahuman ko’g panimba sa Cebu Cathedral, miadto ko sa SRP, Domingo niadtong higayona. Wa ko’y trabaho. Dili ko makalimot sa seawall sa maong dapit. Gusto kong makita si Gabriel bisan sa paghandom lang niini.

Landong na sa seawall sa akong pag-abot. Gitan-aw ko ang akong relo. Alas singko imedya sa hapon. Usa ka lalaki ang akong nakita nga naghinuktok samtang naglingkod sa seawall. Dili siya bag-o nako. Kaila ko siya. Si Ador.

“Parehas ta, no, di makalimot dinhi?”

Naglantaw ko sa lawod, diha ko sa luyo ni Ador. Mihuros ang hangin. Nakapangiyugpos ko. Mitindog si Ador, milantaw sab siya sa lawod. Mora ba’g duna kami gipangita sa tinapya sa mga balod.

“Usa ka handumanan namo ni Teresa kining seawall, Cynthia. Anhi mi magpalabay sa higayon.”

Nagkasugat ang among panan-aw ni Ador. Nagkadungan ang among panghupaw.

“Sakit ang kalit nga pagtalikod sa gugma, Ador. Wa ta magdahom. Wa gyod.”

“O. Apan haguka ang gugma ni Teresa. Nakigminyo siya’g laing lalaki. Gusto ko siyang kasilagan. Apan di ko makahimo. Mao nga handumon gihapon nako siya.”

“Managsama si Teresa ug Gabriel. Laing babaye ang iyang gipakaslan. Gusto ko sab siyang kasilagan apan di ko makahimo. Mao nga mosuroy gyod ko dinhi matag Domingo sa hapon aron handumon siya. Kining dapita maoy saksi sa pagtibuok sa among gugma sa usa’g usa. Apan anugon. Haguka ang gugma niya nako.”

Managsama ang among gibati ni Ador niadtong tungora. Gigapos sa kaguol ang akong kasingkasing.

“Moabot ra gihapon ang panahon nga hingpit kong makalimtan si Teresa. Didto unya sa Qatar, isipon ko na lang siya nga usa ka damgo. Molarga na ko ugma, Cynthia.”

“Parehas ta, Ador. Gustong molingkawas sa sakit nga kagahapon. Ugma,  molarga na sab ko paingon sa Singapore. Nadawat ko’g trabaho didto sa usa ka dakong kompaniya.”

Managsama kami si Ador, nga Civil Engineer.

Milabay ang duha ka tuig. Mipauli ko sa Cebu. Human ko manimba usa ka Domingo sa Cebu Cathedral, misuroy ko sa SRP. Wala na ang gibati  kong kasakit sa dughan. Nakapahiyom ko, diha usab si Ador. Mipauli usab diay siya sa Cebu.

Nagpahiyomay kami.

“Kumosta, Cynthia?”

“Nia, dalaga gihapon. Wa na si Gabriel sa akong kasingkasing, Ador.

“Ulitawo pa sab ko, Cynthia. Milampos ko sa akong gusto. Hingpit ko nang nakalimtan si Teresa.”

Nagtinutokay kami si Cynthia. Adunay talagsaong mensahe ang kinislap sa among mga mata, nga kami ra ang nasayod. Nagpahiyomay kami. Hapit na motikyop ang kagabhion sa among pagbiya sa SRP. Nagkuptanay kami sa kamot. (Kataposn)