Giuhaw na usab si Adora mangtas

Nagubot na usab ang sityo Dugdong dihang duna na usay hipalgan nga patay’ng lawas sa usa ka tawo. Ug ang patay’ng lawas gipanag-iya ni Kakoy nga anak ulitawo ni Mesyo-Tanang nga mamaligyaay og tabako sa lungsod. Puwerteng hilak nilang Mesyo ug Tanang sa gidangatan sa ilang anak nga ulitawo nga matud pa nabiktima sa balbal.

“Mao kana, Mesyo, Tanang, klaro kaayo nga ang inyong anak ulitawo gisuyopan sa iyang dugo. Hasta gani ang iyang kinatawo gikuha og apil,” nagkanayon ang barangay kapitan nga si Kapitan Baldo.

“Kun mao na, Kapitan, duna diay ungo dinhi sa atong dapit,” kahilakon si Tanang nga namulong sumpay sa gitabi sa kapitan.

“Mao na, busa, ang angay natong buhaton mao nga magbantay gyod ta matag gabii, unya, mag-andam gyod tag hait nga armas, mas maayo kanang dunay boronse ang tumoy,” pahayag sa  kapitan dinhi sa ilang barangay.

“Magbayad gyod ang maong mangtas nako, ako’y mopatay anang demonyoha,” nanganti si Mesyo nga nagluha ang mga mata. Sa usa ka karaang balay nga nahimutang sa sabakan sa bungtod sayo nga mibangon si Adora nga anak dalaga nilang Insiang ug Undoy nga taudtaod nang mitaliwan sa laing kalibotan. Nag-inusara na lang si Adora ug daghang nahibulong kay dili man siya mahadlok nga mao rang usa sa ilang balay. Ning mga orasa sa kabuntagon muadto si Adora sa may kilid sa pangpang nga naa sa atbang diin dunay tin-aw kaayong tubod sa tubig. Kining maong tubod nakahimo’g linaw sa may ubos ug adto usahay maglangoylangoy si Adora nga hubo ang lawas. Talagsa ra ang maligo dinhi kay lagi gidungog man ang maong linaw nga dunay dili-ingon-kanato nga nagpuyo ug kutob sa maligo taptan gyod og sakit sa panit nga gitawag og sanla. Hinuon, may usa ka ulitawo nga gawas kang  Adora makita pod nga maglangoylangoy dinhi ug kini mao si Intoy. Guwapo si Intoy. Ugaling lang may pagka bungol. Igo lang kining mopahiyom sa higayon nga imong pakigsultihan kay lagi dunay deperensiya sa iyang pandungog.

Unya pagkasunod adlaw ug sa misunod nga mga adlaw daghan nang mga ulitawo ang gipangbalbal. Mokapin na sa napulo ug dinhi misalta na sa kapungot ang kapitan.

“Dili na gyod ta mangatulog ini, ato na gyong tukawan kanang mangtas nga ungo aron atong madakpan ug unya atong bitayon...” nagkanayon si Kapitan Baldo. Nagkurog siya sa kalagot.

Unya usa ka gabii nahisangko sila sa may linaw duol sa tubod ug ilang nakita ni Kapitan Baldo ang usa ka babaye nga naligo nga hubo ang lawas ug nakaila sila niini. Si Adora! Kaanindot og lawas ni Adora! ni Kapitan Baldo pa sa hilom. .Unya mimando siya sa iyang lima ka tanod nga ilang bantayan si Adora kay basin kini ang biktimahon sa mangtas nga ungo.

Apan sa ilang pagduol kalit lang milukso si Adora ug gipamugno ang lima ka tanod ug gisuyopan sa ilang  dugo. Dayon si Kapitan Baldo ang gisunod. Nahimong pula ang bulok sa tubig linaw. Taudtaod miabot si Istoy unya malipayon kaayo ang duruha nga naglangoylangoy sa tubig sa linaw. Pulos hubo ang duha nila ka lawas ug unya gipaak dayon ni Adora ang liog ni Intoy ug namulong.

“Ayaw lang kahadlok, Intoy, kay mahal ko ikaw, dili ko ikaw patyon, suyopan ko ikaw sa imong dugo, ug unya matakdan ka na nako nga usa ka mangtasssss!!!” (Katapusan)