“Call Girl”

Nagkasabot sila si Melody ug ang doktor nga manlakaw. Nakasabot si Melody kun unsay tumong sa doktor. Tuod, wala siya masayop kay human sila makasakay sa taksi giingnan sa doktor ang drayber nga adto sila sa motel sa V. Rama Avenue. Gisaw-an na usab nila ni Melody ug sa doktor ang kalipay. Gikan niadto, sila na ang kanunay mag-uban kay wala na man ‘sab modawat pa si Melody og customer. Nagbag-o na g’yud si Melody. Milabay ang mga buwan ug nagkasuod na kaayo sila si Melody ug Dr. Vincent.

Usa ka adlaw, nakabantay si Melody nga luya kaayo ang iyang panglawas, mora siya’g kasukaon. Nahinumdom si Melody nga ingon niini ang iyang gibati kaniadto dihang nagmabdos siya sa anak sa Amerikano.

Naglibog si Melody kun ipakuha ba niya ang iyang gisabak kay sa tanto nila nga panagkuyog, anam-anam siya nga mibati og gugma sa doktor.

Apan sayang kay mag-unsa man kun siya ra ang nakagusto sa doktor ug ang lalaki wala kini pagbati kaniya.

Miadto si Melody sa klinika ni Dr. Vincent.  “Uy, nahasuroy ka man Melody?” matud sa doktor nga nakabantay nga masub-anon ang panagway ni Melody.

“Mimabdos ko Vincent, gusto nako nga imong buhaton ang sama sa gihimo nimo kaniadto nako,” miduko si Melody. “Ha? Ayaw, dili ko mosugot nga ipakuha nimo ang atong anak,” misaka ang tingog ni Vincent.

“Unsay buot mo nga ipasabot nga magpakauwaw ko nga manganak sa bata nga wala’y ilhon nga amahan?” mitutok si Melody kang Vincent.

Nagkatawa si Dr. Vincent nga nagtan-aw kang Melody. “Ayaw gud ko og bugal-bugali Vincent, kun dili ka mokuha sa akong gisabak moadto ko og laing doktor,” matud ni Melody.

Gigunitan ni Vincent ang tuo nga kamot ni Melody. “Abi nimo Melody, sa tanto nato nga panag-uban mibati na ko og gugma kanimo. Busa ayaw ipakuha ang imong gisabak  kay magpakasal ko kanimo.”

Wala mapugngi ni Melody ang paglugmaw sa iyang mga luha nga nakadungog sa gisulti ni Vincent. “Salamat kaayo kun mao kana Vincent, ingon usab niana ang akong gibati nga nakat-on ko paghigugma nimo sa mga adlaw sa atong panag-uban.”

 Nalipay kaayo si Melody nga may kinutoban diay ang iyang pagka call girl ug mahimutang siya sa matarong nga pagpakabuhi. (Kataposan)