Masayop gyud diay usahay ang gugma

Nahingangha si Carmen sa akong gisulti. Ig-agaw igtagsa ko si Carmen ug nag-ipon mi’g puyo sa boarding house sa Sanciangko. Taga probinsiya mi. Mao pay akong pag-abot sa siyudad. Mipauli man gud ko kay weekend man. Wa mopauli si Carmen sa among lungsod.

“Unsa, gipakyas mo si Jude?”

“Oo, uy. Wa man koy gugma niya ba.”

“Ah, nasayod na ko. Usa nila ni Rudy ug Mel ang imong gisugot, no, Carla?”

Gipahiyoman ko sa akong ig-agaw. Gitingsian ko siya.

“Nasayop ka, Gaw. Parehas kong gipakyas sab sila si Rudy ug Mel sa ilang gugma nako.”

“Uy, unsa man diay imong ambisyon sa kinabuhi, Gaw? Magpakatiguwang dalaga ka?”

Nahimuot gyud ko sa akong ig-agaw.

“Di, uy. Gusto sab kong makabaton og hinigugma, Gaw. Pero wa pa moabot nako ang binuhat nga akong gimahal.” Prangka nako.

Nahilom na lang si Carmen. Nangandam siya sa iyang mga dad-unon alang sa pagtungha. Usa ra ka unibersidad ang among gitunghaan. Second year na mi sa college. Buntag pa niadtong tungora. Nangadlawon ko paggikan sa among lungsod aron makaabot ko sa una kong subject sa buntag.

Si Rudy, Mel Jude schoolmate namo ni Carmen. Mao bitaw nga nagkaila mi. Husto sila sa barog ug ambongan sab. Pero mao lagi, di katudloan ang kasingkasing. Wa gyod ko’y gugma nila.

Usa ka adlaw, gikaila ko si Gerald.

Nagkaila mi sa library sa unibersidad.  Aduna ko’y gi-research niadtong higayona ug miduol siya nako. Ug karon, suod na ming managhigala. Dili kaayo ambongan si Gerald, pero bug-at og sex appeal. Mora’g katulgon kanunay ang iyang mga mata.

“Kanunay na kong nakakita nimo dinhi sa eskuylahan, Carla. Pero nagpanuko ko sa pag-ila-ila nimo kay basi’g lainon nimo’g sabot. Masuko ka.”

“Nganong masuko man ko?”

“Nalipay bitaw ko nga nagkaila na gyod ta.”

Gitug-an ko kang Carmen ang akong nabatyagan kang Gerald. Nalipay siya.

“Siya na tingali ang lalaki nga para nimo, Carla.”

“Siya na gyod, Gaw. Nakaseguro gyod ko. Kun iya kong pangulitawhan, sugton dayon nako siya.”

Nasayod si Carmen bahin kang Gerald kay gisultihan ko na man siya sa among panagkaila ni Gerald.

Misamot ang among panagsuod ni Gerald. Hangtod nga nangulitawo siya nako. Ug kay gimahal ko man sab siya, gidawat ko dayon ang iyang gugma. Misamot ako kamalipayon. Ug usa ka adlaw nga wala mi klase, nanuroy mi sa downtown. Pero sa kalit lang, usa ka babaye ang miduol namo ni Gerald.

“Garaldine! Daan pa gyud ko nga ikaw gyud ni, Geraldine.”

Nahingangha ko. Mikunot ang akong agtang nga mitan-aw kang Gerald. Nakita ko nga nangluspad si Gerald.

G-Geraldine!” Nabundak ko kining pulonga.

Walay tingogtingog nga mibiya si Gerald nako. Nagdali siya. Ug nasayran nako nga tomboy diay si Gerald. Nakahilak ko sa nahitabo sa una kong gugma. (Kataposan)