Nalahi na man

Dear Tita Salie,

Maayong adlaw, Tita ug sa tanan nga readers sa imong column. I know nga daghan na gyod kaayo ang tigbasahan niining imong column. Maayo man god ka mohatag sa imong tambag.

Just call me Ms. Virgo, single mom ko ug ang akong anak nia gyod kanako bisan pa man kun lisod kaayo ang pagbuhi ug pagpadako og anak. Karon lang gyod nako nasabtan ang akong mga ginikanan ang ilang naagian nga kalisod dihang  ako pa ang ilang gibuhi ug gimatuto.

Duha man god mi nga gipabuntisan sa amahan sa akong anak. Ug karon ang amahan sa akong anak tua karon sa Manila. Unya ako siyang gipapili kun kinsa namong duha ang iyang dayonon. Ug dako nakong kalipay ako man ang iyang napilian.

Busa amo na nga gipahimutang ang tanan lakip na niini ang iyang pagtabang ug suporta sa among anak. Tuod man nagsige na siya og padala matag bulan alang sa bata.

Samtang nagkadugay ang paglabay sa panahon nalahi na man ang sitwasyon kay magpadala na man siya kun ganahan. Tagsa na lang gyod kaayo, Tita.

Puyde ba nako siya pasakaan og kaso? Unsang kasoha ang puyde nako ipasaka, Tita? Palihog pasabta ko sa angay nakong buhaton. Thank you so much and more power.

* * *

Hello, Ms. Virgo,

Mao gyod kini ang akong gibalik-balik pagsulti ngadto sa atong mga kabatan-onan karon nga dili gyod nato masabtan kun nganong ingon niini ang atong mga ginikanan. Kun sila estrikto ato dayong hunahunaon nga sila kill joy ug para sa uban daotan. Unya na nato masabtan ang atong mga ginikanan kun kita na usab ang dunay mga anak. Mao nga ang uban nga gahi og ulo ug misupak sa ilang ginikanan nagbasol sila tungod kay naglisod sila karon sa ilang pagpuyo.

Sa imong sitwasyon nga layo sa amahan sa imong anak maglisod gyod ka pagpugos kaniya nga mosuporta siya sa bata tungod kay tua man siya sa Manila. Tungod kay layo lagi ug dili nimo siya masayon-sayon og adto puyde na niyang limot-limotan ang iyang obligasyon sa iyang anak.

Dili usab kita makapasaka og kaso kaniya kun anhi kalang dinhi. Dali ra unta kadto pagpugos kaniya kun imong adtoon ang iyang gitrabahoan ug didto nimo siya isumbong sa ilang kompanya. Aron ang iya nang company ang mokuha sa dapat madawat sa bata.

Pero kun duna kay idea kun hain magtrabaho ang amahan sa bata pangita og email address niini aron imo na lang i-email ang imong reklamo ngadto sa ilang HR or personel in-charge. -- Tita Salie