Pinakamamahal

Dear Tita Salie,

Maayong adlaw. Hinaot nga daghan pa kaayo ka og matabangan ug daghan pang dughan ang maluagan sa mga suliran.

Tagoa lang ko sa pangalan nga  Joan, taga San Isidro, Leyte ko apan nia karon dinhi sa Cebu kay nanimpalad intawon aron akong matabangan ang akong mga ginikanan sa kalisod sa kinabuhi. Nalipay na lang ko nga duna ko’y ikapadala sa akong pinakamamahal nga mga ginikanan matag bulan.

34 anyos na ang akong pangidaron karon, Tita Salie, apan nagpabilin lang gihapon nga dalaga. Duna ko’y boyfriend nga buotan kaayo ug mahal kaayo ko niya.

Kining akong uyab nagsige na og hangyo kanako nga magminyo na mi apan kanunay ko siyang gibalibaran tungod kay dili pa ko mosugot. Maluoy man god ko sa akong mga ginikanan kay wala na unya motabang kanila kun maminyo na ko. Kay dili na man unya ko kaderetso og tabang kanila kun aduna na ko’y bana.

Mahal man god nako pag-ayo ang akong mga ginikanan. Sila ang akong pinakamamahal labaw pa sa pagmahal sa akong kaugalingon.

Sakto ba kining akong desisyon, Tita Salie? Palihog tabangi og pasabta ko. Thank you so much.

* * *

Hello Joan,

Nalipay ko samtang nagbasa ko sa imong tampo. Ug nagpasalamat ko nga dunay anak nga sama kanimo’g batasan. Tungod kay daghan kaayo karon, labina sa atong bag-o nga generation nga dili na kamao motan-aw sa mga sakripisyo sa ilang mga ginikanan. Daghan sa atong mga kabatan-onan karon nga wala na’y respeto ug pagtahod sa ilang mga ginikanan. Yano na lang kaayo nilang tubagon ang ilang mga inahan o amahan, yano na kaayo nilang suklan ug pasakitan. Aduna pay uban nga anak nga mopatay sa ilang kaugalingong ginikanan.

Usa ikaw ka dalayon ug modelo nga anak nga dapat panaminan sa uban tungod kay kamao kang motan-aw sa mga tawo nga midala kanimo niining kalibotana. Apan dili maayo nga dili usab nimo hunahunaon ang imong kaugalingon. Kun dili ka maminyo mag-unsa na man lang unya ka kun wala na ang imong mama ug papa kun wala na ang imong pamilya. Kinsa na man lang  unya ang motabang sa kanimo kun ikaw tigulang na?

Hangyoa lang ang imong bana nga kun puyde moduaw ug motabang lang gihapon ka sa imong mama ug papa bisan kun kamo minyo na. Wala’y problema nga dili masulbad kun kini inyong lingkoran  ug estoryahan. Anaa lang kana sa inyong pagsinabtanay.

-- Tita Salie