Pagsuksok aron dunay makuot

Dako-dako man gyud ang imong ranggo ug suweldo sa munisipyo Mike, may pa hinuon nga karong abli sa klase adto nato paeskwelahon sa private school sa siyudad ang duha ta ka buok anak aron proud ug bilib kaayo ang mga tawo nato,” sugyot ni Anita ngadto sa iyang bana.

“Sus, sa national high school lang na sila sa lungsod, makadaginot pa ta sa galastohan. Mahal kaayo ang maintenance karong panahona Anita,” ni Mike.

“Aw na hala kun mao nay imong pagbuot uyon-uyon lang ko,” tubag ni Anita.

“Kung adto sa siyudad, mahal ang abangan sa kuwarto ug taga-liog usab ang bayranan sa mga pribadong tunghaan. Mas maka-save ta kung sa public school lang usa total hayskol pa bitaw na. Ang importante nga maka-eskwela sa college bisan mopili pa na sila og tunghaan puhon,” ni Mike nga hapit na mahuman sa paglaba kay adlaw’ng Sabado wala’y trabaho ang gobiyerno.

“Husto ka Mike mas maayo gyud nang dunay savings aron panahon sa emehensiya duna kita’y makuot,” ni Anita.

Taliabot na ang pista sa ilang baryo. Bag-ohay pa lang sila nakapanihapon ug nagpahayahay sa may kayda.

“Mike, hapit na man diay ang pista nato diri daghan ra ba ta og bisita. Maghikay ta og daghan aron di ta mauwawan sa atong mga bisita,” ni Anita.

“Unya unsa may plano nimo?” ni Mike.

“May pag mo-loan ka sa GSIS para maka-order ta og litson baboy unya paresan og sari-saring mga potahe sama sa humba, menudo, afritada ug sinugbang isdang dagko!” ni Anita.

“Naa na sad ka ana. Kun mo-loan ko sa GSIS gamay na lang ang mahabilin sa akong suweldo kay dedakan matag bulan. GSIS pay imo nga mat-an pa’s pinya!” ni Mike.

“Unya unsa na lang diay atong hikayon?” pangutana ni Anita.“Magpalit lang ta’g kinilong baboy sa merkado dili na lang ta mag-litson-litson ang importante sa pista mao ang pagsimba. Pasalamat sa mga grasya ug kaayohan nga nadawat nato,” tubag ni Mike.

Igo na lang miyango-yango si Anita. Mamahuway na unta ang magtiayon sa dihang may mi-tuktok nga lanog kaayo.

“Tok! Tok! tok!,” ni Andot nga naghangos ug nagkanayon,” Manang Anita, nanganak na akong asawa og cesarian siya, wa koy laing kadangpan Manang kamo ra gyud ni Manoy Mike, tabangi intawon ko ninyo,” ni Andot nga masulob-on kaayo ang panagway.

“Mao ba, ayaw kabalaka Andot nia manihoa lang ni,” ni Mike nga mitunol sa kuwarta. Gidawat dayon ni Andot ug nagpasalamat.

“Maayo gyud diay nga dunay savings kay dili nato matagna ang panahon,” nagkanayon si Anita sa hilom. (Kataposan)