Maria Magdalena - Gula 154

“Ayaw ko’g pagahi-gahii sa imong tingog kay wa kay katungod nga masuko nako. Wa tay relasyon. Wa kay labot sa akong kinabuhi, Raffy. Wa tay mutual understanding. Tingalig nagtuo ka nga tungod kay nakagamit ka na nako, may katungod ka nang mogawong sa akong kinabuhi.”

“M-Maria...”

“Hinumdomi nga wa ko pa dawata ang gugmang imong gihalad nako. Kun nagpagamit man ko nimo, bunga lang kadto sa pagkaanod nako sa bul-og sa tentasyon sa unod. Busa wa kay katungod sa pag-demand sa akong time.”

“I-I’m sorry, Maria. Ku-kuan man gud, excited man gud kaayo kung magkakita ta. Maong disappointed ko dihang wa ka gyud motubag sa akong mga text.”

“Katungod ko ang pagpakahilom ug sa dili pagtubag sa imong mga text.”

“O-okey. D-di na lang ta maglalis bahin niana. S-sorry. Peace na ta, ha. Okey ba, Maria?”

Wala ko motingog.

“Di ko gustong masuko ka kanako, Maria,” ni Raffy pa. “Please, peace na ta. Nadala lang ko sa akong gibati. Sorry gyud kaayo.”

Mora’g natandog gyud ang akong garbo sa pagpakita ni Raffy sa iyang pagka-dominante. Bisan kun ubos na akong pagka-babaye. Sa akong kalagot, wala nako dawata ang iyang papakig-peace nako. -- Sumpayan pa