“Call Girl”

Mao pa g’yuy paggawas ni Melody sa simbahan gikan nga mitambong og santos nga misa dihang mikurog ang iyang shoulder bag. Nagpasabot nga adunay mitawag o kaha mipadala kaniya og text message.

Nabatasan na ni Melody nga matag Domingo mosimba g’yud siya aron sa pagpangayo’g pasaylo sa iyang mga nahimong kasal-anan. Ang amiga diay niya nga si Daisy nga tua sa Manila ang nag-text.  “Larga ugma dayon sa buntag gwapa kay diay maayong negosyo,” matud ni Daisy sa iyang text message. Gitawgan ni Melody ang amiga nga maoy nagsilbi nga iyang kontak sa Manila.

“Duna ka’y kliyente day, usa ni siya ka bank executive maoy akong na-canvass. Nakontrata g’yud nako og thirty thousand karong Saturday ug Sunday adto mo sa Batangas,” matud ni Daisy.

Misugot si Melody sa presyo ug mipasalig nga molarga dayon pagka-ugma. Usa ka class nga call girl si Melody ug sagad mga adunahan ug may kaya g’yud ang iyang mga customer nga makaabot sa iyang presyo.

Duna siya’y mga kontak sama ni Daisy nga mopakita lang og hulagway ni Melody ngadto sa mga tawo nga ilang tanyagan sa makapalipay nga serbisyo.

Sagad g’yud nga ang customer ni Melody mao pa ang mobayad sa iyang magasto pagsakay sa eroplano, nagpasabot nga limpyo ang madawat niya ang gikasabotang kantidad.

Mao kini ang rason nga bisan og call girl lang si Melody, apan nakapatukod kini og maanindot nga balay nga gipuy-an niya ug sa iyang mga ginikanan.

Daghan ang nanguyab kang Melody apan wala siya mikubit tungod kay iyang gilantaw nga mag-antos ra siya sa ilang panag-uban kay dili kini makahatag kaniya og kaharohay.

“Maayo kay miabot ka na day... Ako dayong tawgon si Charles kay aron mangadto dayon kamo sa Batangas. Gwapo ra ba na’ng imong customer day,” ni Daisy pa.

Tuod, nagkita sila’ng tulo si Daisy, Melody ug ni Charles. “Wala ka g’yuy kalainan sa hulagway Mel, mas gwapa ka pa gani sa personal. Anugon nga wala ta magkita pagkadistino nako sa Cebu last year,” matud ni Charles.

Duha g’yud sila ka adlaw, Sabado ug Domingo nga miistar sa nindot kaayong cottage sa Batangas nga nag-umbaw sa Batangas Bay. Gitagbaw g’yud ni Melody si Charles sa iyang serbisyo.

“Wala g’yud ko masayop sa pagkuha nimo Mel,” matud sa mapahiyumon nga si Charles dungan sa pagtunol niya sa P40,000 ngadto kang Melody. Nahinangop kaayo si Melody sa kadaku sa iyang nadawat.

Plano ni Melody nga hatagan niya’g P5,000 si Daisy ug iya ang P35,000. Gihatud ni Charles si Melody sa Quezon City. “Mokontak ra unya ko nimo kun makigdeyt ko pag-usab,” giingnan ni Charles si Melody.  (Sumpayan)