Maria Magdalena

Paggawas namo sa simbahan human sa misa, wala ko mokuyog nilang Papa ug Mama sa pagpauli tungod kay gi-invite ko sa Singles for Christ nga mo-observe sa ilang grupo. Ug samtang nagpaabot ko nga magsugod sila...naglingkod lang ko sa kilid sa session room. Samtang ako naghulat nga magsugod ang activity sa Singles for Christ, nakugang ko dihang may lalaki nga mitupad nako. Si Raffy!

Gikulbaan ko pagkakita ni Raffy. Nasayod ko’g unsay iyang tuyo nako. Nakaseguro kong iya kong sukmatan nganong wala ko mo-reply sa iyang mga text sa nakalabay nga adlaw.

“Mahimo bang magsulti ta?” Nagkanayon si Raffy. “Nga-ngano man?” Misumbalik ko’g pangutana.

“May mahinungdanon kong tuyo nimo.

“Milingi-lingi ko unya misanong ko sa gihangyo ni Raffy. Sa usa ka punoan sa akasya nga nahimutang sa kilid sa simbahan, didto kami nagsultihanay.

Ug wala ko masayop sa akong pangagpas. Misukmat gayod si Raffy nganong wala ko mo-reply sa iyang text.

“I’m sorry,” nako pa. “Wa koy load niadtong tungora.”

“Wa diay namaligya’g load sa inyo nga duol ra man ang tindahan. Puyde man nga mag-load ka kun gusto gyud nimong tubagon ang akong text,” niya pa. “Dili na ka interesado natong duha?”

“Nasuko ka ba?”

“Ug kinsa man ang dili maglagot. Importante kaayo ang akong tuyo nimo pero imo lang gibale-wala,” nagkanayon si Raffy. -- Sumpayan pa