Ang Singer Gula 7

Miinom si Jane sa beer nga gitunol kaniya ni Redem. Nangilog-kilog si Jane dihang miabot na ang beer sa iyang tiyan. Nanginit ang iyang kalawasan. “Basin og mahubog ko Redem ha?” paraygon ang tingog ni Jane.

Mibalik sa ilang nahimutangan si Mr. Ong ug may gisulti kini ngadto ni Redem. Miyango-yango si Redem ug mitan-aw kang Jane sa wala pa milakaw si Mr. Ong.

“Pakantahon kuno ka Jane ni Mr. Ong kay gusto siya’ng mamati nimo nga mokanta,” ni Redem. Wala gayud mobalibad si Jane. “Sigi, total nanginit na ang akong kalawasan.”

Gisugyot ni Redem nga ang kantahon ni Jane mao ang Saving All My Love for You nga maoy gidag-an niya pagsugod og apil sa radio amateur hour. Wala g’yud tuod magmahay si Mr. Ong kay midayeg kaayo kini kang Jane.

“Sa Lunes na lang ni mosugod pagkanta si Jane sir kay modepensa na ‘sab ni siya ugma sa iyang pagka kampyon,” giingnan ni Redem si Mr. Ong. Igo lang miyango si Mr. Ong.

Nananghid sila si Jane ug Redem kang Mr. Ong nga molakaw na. Apan wala sila mideritso pagpauli. Misakay sila sa motorsiklo. “Mosuroy ‘sa ta Jane kay total sayo pa man kaayo,” giingnan ni Redem si Jane.

“No problem, tana,” ni Jane pa nga miangkas dayon sa motor ni Redem. Misirit ang motorsiklo nga gisakyan nila paingon sa IT Park. Nagpalabay sila sa oras sulod sa usa ka restaurant.

Miorder si Redem og init nga sabaw. “Maayo ni nimo Jane kay nakainom ka ra ba og usa ka botelya nga beer,” matud sa radio technician. Nagsigi og tutok si Redem sa dalaga.

Nakabantay g’yud si Jane mao nga gibati siya og kauwaw. “I love you, Jane,” wala na g’yud magduha-duha pa si Redem sa pagpanguyab sa dalaga. Mipasiplat lang si Jane kang Redem.

Bisan og wala kini motubag sa gilitok nga “i love you” ni Redem, apan mipahiyom kini nga mitutok sa radio technician.

“I love you Jane,” gipig-it ni Redem ang kamot ni Jane. Pahiyom ang iyang gibawos ngadto sa ulitawo nga technician. “Ako ba nga sabton nga maangkon nako ang imong gugma tungod sa matam-is mo nga pahiyom?”

Misamot katam-is ang pahiyom ni Jane. “I love you Redem,” Naggunitanay sila si Redem ug Jane ug nagtagbo ang masi’g nila ka tinan-awan. Migawas sila sa restaurant ug misakay sa motorsiklo.

“Ikaw na g’yud maoy akong dad-on sa altar sa kaminyoon Jane,” ni Redem nga miangkas sa motor. Misunod pag-angkas si Jane. Migakus pag-ayo si Jane kang Redem, gakus nga puno sa pagmahal. – Kataposan