Dear Tita Salie,
Have a wonderful day. Hope everything is fine with you our dear Tita. Please call me Ms. Lonely kay alang kanako mao gyod kini ang akong feeling karon. Lonely kaayo ko tungod sa nahitabo. Hinaot unta, Tita, nga imo kong tabangan niining akong suliran kay medyo nabug-atan ko ug wala na ko masayod kun unsay akong buhaton.
Naa ko’y boyfriend sa una maayo pa kaayo ang among relasyon. Bisan tuod kun nag-eskuyla pa siya apan still makakita gihapon siya og oras aron iyang igahin kanako. Dako kaayo nakong kalipay, Tita, kung magkita mi ug magkaestorya. Mahal kaayo nako siya, Tita.
Apan karon nagkabulag mi ug involed niini ang iyang parents. Gipabulagan ko sa iyang parents kay kuno makabwisit ang uyab-uyab sa iyang pagtuon. Gisakitan ko, Tita, tungod kay ako pa man ganing gitabangan ang ilang anak everytime nga duna siya’y problema sa iyang family. Gi-encourage nako siya kanunay nga tarongon ang iyang pagtuon aron siya makahuman nga walay problema.
Apan iyang gibalewala ang akong effort, Tita, ug wala pa niya gipaglaban ang among gugma. Nisunod lang siya sa iyang parents karon wala na mi ug sakit kaayo ang akong dughan. Unsa may akong buhaton, Tita? Palihog pasabta ko. Thank you so much.
* * *
Dearest Ms. Lonely,
Ambot kaha kun pila lang ka ginikanan ang mosugot kun ang ilang mga anak nga nag-eskuyla mosulod sa uyab-uyab o gugma. Apan matud sa akong nasayran halos tanan supak gyod nga ang ilang mga anak mag-uyab-uyab samtang nag-eskuyla pa. Tungod kay nasayod sila nga kasagaran sa mga estudyante ma-distruct gyod sa ilang pagtuon. Pero dunay mga estudyante nga mas nindot ang ilang performance sa klase tungod kay inspired sila permi sa ilang lovelife. Pero pipila lamang ang ingon niini ang nahitabo, kay ang kasagaran gyod napalpak ang pagtuon tungod kay nakipagrelasyon.
Pero alang kanako sayop usab kun kita moingon nga makabwisit ang uyab-uyab kun kita nagtuon pa. Dili makabwisit hinuon maapektohan gyod tungod kay makuhaan na man ang oras sa iyang pagtuon. Ug ang uban, instead nga mosulod sa klase adto na man hinuon sa uyab magsige og kuyog. Mao kini ang sitwasyon nga gustong likayan sa mga ginikanan ug dili nila gusto nga mahitabo ug buhaton sa ilang mga anak.
Busa sabta lamang ang imong hinigugma kun iyang gisunod ang gusto sa iyang papa ug mama. Kay kun tinuod siya nga nahigugma kanimo, sa dili madugay, inighuman niya’g eskuyla mobalik gyod siya kanimo.
-- Tita Salie