Marshal sa WPP suspensohon lang, walay priso?

Dakong tamparos ngadto sa nawong sa taga Witness Protection Program (WPP) kining kontrobersiyal nga gihimo sa ilang marshal ubos sa Code Name: Billy, kinsa gireklamo sa usa ka 21 anyos gang rape victim, kay imbes gisangonan nga maoy tigbantay sa biktima nga dili na malugos pag-usab, mao hinuoy miunay pag-rape sa gibantayan. Ug dili kay kausa ra. Kadaghan pa gyud!

Kun may reklamo ang biktima nga gipaabot sa talad sa kapolisan, dapat prisohon gyud ang gireklamo ug patubagon sa sala nga iyang nahimo. Ug mabuhian lang siya kun mamatud-an nga ang kasong gipasangil ngadto kaniya, usa lang ka tumotumo.

Gani, puwede mang mo-counter pagkiha og moral damages ang suspetsado ngadto sa namakak nga kihante. Busa, kun wa gyu’y gibuhat nga daotan ang marshal, di siya angay mahadlok. Atubangon niya ang pasangil uban sa iyang kinahaitang hinagiban nga mao ang kamatinud-anon.

Kini bayang pagsuspenso ni Billy, nagpaila lang nga ang tagdumala sa WPP kombinsido nga ang ilang tawo nakabuhat gyud og salaod. Ug agi’g paghatag og silot, ila kining gisuspenso.

Sa ato pa, ning paghatag nila og disciplinary action sa marshal, sama ra nga miangkon sila nga nakasala ang ilang kauban sa buhat ngadto sa biktima. Nan, kay amenado man sila, igo na ba lang diay ang paghatag og pipila ka adlaw nga suspensiyon sa marshal? Ang priso diay, mga taga WPP, wad-on na lang?

Kuyaw man gud nga magpabiling gawasnon ang maong marshal. Lalim bay, labaw pa siya sa iring nga sungkaban. Hunahunaa lang. Ang gang rapist victim midangop sa buhatan sa WPP aron maproteksiyonan ug mabantayan nga dili na mahuong sa mga rapists. Apan naunsa ba, nga giunay man nuog kaon sa dukirok nga magbalantay? Abi nako’g septi ang tawo nga nanginahanglan’g tabang sa mga kamot sa balaod. Dili diay, no?Asa...asa... na man lang diay kami mopasilong sa higayon nga maabtan mi’g ulan sa among kinabuhi?

Timan-i. Rape is a criminal case. Kun mamatud-an ang sinumbong nga sad-an, mahimo man ganing mabilanggo sa tibuok niyang kinabuhi. Mosamot kadako ang kaso kun ang lugoson sa dukirok usa ka buang, o may deperensiya sa utok. Sa laktod, kun suspenso lang sa trabaho ang isilot, kuwang kaayo ni, uy! Mas maayo man gani taktakon sa trabaho, ayha pa ibalhog sa bilanggoan! Kana kun mapruyba nga sad-an, ha?