Robinhood

Gula 5

“Imo ning sakyanan sir Renan? Maikog na kaayo mi nimo kay imo pa g’yud diay mi nga ihatud?” pangutana ni Carmela samtang misugod na pagpadagan si Renan paingon sa probinsya. “May subra pa man kadtong kwarta nga gihatag nimo ni Carmela sir, kami na la’y mopauli sa Tabogon,” matud sa amahan ni Carmela.

Mipahiyom si Renan ug milingi kang Carmela. Gipasiplatan usab niya ang mga ginikanan sa dalaga nga diha maglingkod sa luyo pinaagi sa gamay nga front mirror. “Walay problema Mel, tiwason na lang g’yud nako ang pagtabang kaninyo kay nasugdan na man g’yud,” ni Renan pa.

Gibalik-balik sa mga ginikanan ni Carmela ang pagpasalamat ni Renan sa daku kaayo niini nga natabang kanila. “Kun wala ka pa sir, patay na tingali ko kun nakabuto pa ang apindisaytis  sa ilawom sa akong lawas,” matud ni Meling.

Wala na motingog pa si Renan. “Makasulod ba ang sakyanan ngadto sa inyong balay Mel?” gipakigsultihan ni Renan si Carmela. “Oo, dunay karsada kay duol man sa barangay hall ang among balay,” ni Carmela pa.

Dali ra kaayo sila nga miabot didto sa Tabogon. Milanat lang og kapin sa uras ang ilang pagbiyahe ug  garbo kaayo ang magtiayon nga mipaila-ila ni Renan ngadto sa ilang mga silingan nga misugat sa ilang pag-abot.

Nagsaka og butong si Carlos ug gilamaw. Duna ‘sab siya’y nindot kaayo nga pagkahinog nga saging tundan nga gidalit niya kang Renan mentras nag-andam sila sa ilang pagkaon. “Ayaw na kaayo pagtagad nako Nong Carlos,” giingnan niya ang amahan ni Carmela.

Nahanaw kang Carmela ang kauwaw ngadto ni Renan. Gani wala na siya magtawag pa og sir kay mao kini ang hangyo kaniya ni Renan. “Nindot ‘sab dinhi sa probinsya kay mingaw,” ni Renan pa. Gihawiran si Renan sa magtiayon.

“Ayaw’g balibari sila si Papa ug Mama kay gusto nila nga dili ka dayon mopauli sa siyudad kay giisip ka nila nga sakop sa pamilya. Buotan ka kuno kaayo,” giingnan ni Carmela si Renan. Gitutokan ni Renan si Carmela.

“Ikaw Mel, natan-aw ‘sab nako nga buotan ka kaayo. Pwede ba og manguyab ko nimo?” wala g’yud magduha-duha si Renan sa pagsukna sa dalaga. Daw natuk-an si Carmela ug wala dayon makatubag kay wala siya magtoo nga moabot niini ang ilang panagsulti.

Ang tinuod, kun sa sinugdanan midayeg kaayo si Carmela sa kabuotan ni Renan kaniya ug sa iyang pamilya, karon anam-anam na nga migitib ang usa ka pagbati sa iyang kasing-kasing ngadto kang Renan.

“Pwede man apan ubos ra kaayo ko nga pagka babaye nga imong panguyaban Renan,” ni Carmela pa. - Sumpayan