Gidala sa mangtas ang atop sa balay

Dinhi sa sityo Tubod-Luha si Analyn mao ang labing maanyag nga dalaga nga ikomparar nilang Dulcing, Tinay, Calixta, Adorada, Basya, Victoria ug uban pa dihang mga bag-ong tubo nga mga dalaga dinhi sa ilang sityo. Ug tungod niini natural nga daghan gyung nangulitawo kang Analyn ug usa niini mao si Takoy ang mag-uuma didto sa sityo Siling-Halang.

Motunga lang og kalit kini si Takoy matag pamisita niya sa dalaga. Kana ra bang halawom na ang kagabhion. Dili na moatubang kaniya si Analyn kay dili na kini hustong oras nga ipamisita sa usa ka ulitawo ngadto sa dalaga nga iyang gipangulitawhan. Apan magsige gyud og tuktok sa pultahan si Takoy. Mamugos ra ba.

“Atubanga tawon ko bi, Lyn, kadiyot lang gud,” niini pa.

“Bastos man ka, uy, Takoy. Nangatulog na man mi. Maayo gani kay wala si tatay Kanot kay kun nia pa ron, tigbasan gyud ka sa iyang pinuti,” mora’g naglagot na si Analyn.

“Kadiyot lang gud, Lyn.”

“Gawasa na lang na, Analyn,” hinay ang tingog ni nanay Ibyang nga inahan ni Analyn. “Samok kaayo nang tawhana. Unya, kadiyot lang kay kun ako’y magalgot anang tawhana tadtaran ko man na ba ning pinuti sa imong amahan...”

Migawas si Analyn. Ug nagsulti sila’g kadiyot ni Takoy.

“Pasensiya lang, ha, Analyn. Kay mao ra gyud ning orasa nga makalugar ko’g anhi dinhi nimo.”

“Ayaw na lang gud og anhi nako, kay duna na man koy uyab.”

“Kinsa may imong uyab?”

“Si Masyong.”

“Unsa may naa ana gud. Uyab pa bitaw mo. Mausab diay ang imong hunahuna ug imong buwagan si Masyong. Bugoy man na si Masyong. Wa kay ugma ana niya. Ako maoy angay nimo,” mora’g mikagot ang ngipon ni Takoy.

Unya nananghid si Takoy kang Analyn nga mopauli na sa ilaha didto sa sityo Siling-Halang. Ug nakurat si Analyn kay kalit lang nahanaw sa kangitngit ug unya dunay nabati si Analyn nga kapakapa sa dagkong pako. Mibalik dayon ang dalaga sa ilang sala.

Unya miabot ang kasal nilang Analyn ug Masyong ug naglagot si Takoy nga naghunahuna nga wala lang siya hatagi’g bili ni Analyn. Dunay mga gabii nga halos wala’y undang-undang ang pagwakwak didto sa sityo Siling-Halang ug nahibulong ang mga lumolupyo kinsa ang maong ungo.

“Kinsa gyud kaha nang wakwaka, no, nga mora’g dili na man lang matulog. Miabot gyud sa kaadlawon ang iyang pagwakwak. Aw, magpaduol gani nang wakwaka dinhi sa atong balay, Sima, buak gyung ulo ana sa bala sa akong shot gun...” ni Otik pa nga polis sa lungsod. “Tulo ka buwan na nga magsige’g wakwak dinhi sa atong sityo...”

“Kana si Takoy, Otik, nadungog man na nga magtuwad diha sa iyang kamaisan, mao nay ungo...” ni Sima pa nga asawa ni Otik.

Tuod, dihang nagluon na si Analyn ug Masyong sa usa ka hinimo nilang payag mora’g gikulbaan si Analyn, kay matag gabii, dunay magkaskas sa ilang atop. Usahay, mora’g birahon ang ilang bentana.

“Hait kaayo ning akong pinuti, Analyn,” ni Masyong pa. “Ug talinis pud ning bagakay nga akong giandam...”

“Dili ba kublan man nang mga ungo?” ni Analyn pa nga nangluspad. “Dili ka makapatay ana nila...”

Unya pagka-gabii, may mikalit og tugpa sa ilang atop ug gikaskas taman sa ginhawa ang ilang atop. Unya, giibot pa ang mga nipa ug giharos. Dayon namulong, “Analyn, kay imo man kong gipahilak pahilakon ta pud ka sa kahadlok. Ahhhhh...” Ug  maoy nakita nilang Masyong ug Analyn nga giukab ug gialsa ang ilang atop ug gidala ni Takoy sa paglupad niini.

Tungod sa kalisang sa ilang nakita nagdungan og singgit og pakitabang ang bag-ong magtiayon nga nagkanayon, “tabanggg’ tabangggg tawon  mo, mga silingan ...giukabbb ang among atoppppp!” Ug dihay mga tingog sa ilang mga silingan nga nagsingabot aron motabang kanila. (Kataposan)