Maria Magdalena - Gula 135

Wala na lang ko mangatarongan. Tontohon ko pa ba gihapon si Walter bisan aduna na siya’y ebidensiya? Maong wala na lang ko magtingog.

Tungod sa maong hitabo, nakahukom si Walter sa pagpakigbulag nako. Gikuhaan ko dayon niya sa katungod pagdawat sa iyang allotment. Kay wala man koy ikabayad sa balay napugos ko sa pagpakig-live in kang Darwin. Didto na siya mopuyo tipon nako sa apartment nga akong gipuy-an.

Sa sinugdan, malinawon, malipayon ug tonhay ang panagtipon namo ni Darwin. Wala ko magbasol nga nakig live-in ko niya tungod kay gihigugma ko na man siya sa hilabihan. Apan sa kadugayan, inanay kong nailhan ang matuod nga pagkatawo ni Darwin. Usa diay siya ka sadista, palahubog pa ug tiggamitan pa ug drugas.

Maayo gyud nakong pagkasulod sa laang ni Darwin. Nagtuo ko nga gentleman ug buotan gyud siya sa sinugdan tungod kay wala man gyud siya mopakita’g mga lihok nga makapaduda kanako. Mao man gani nga kadali rang nahulog ang akong pagbati ngadto kaniya nga misangko gayod sa among panag-live in.

Pero dihang nagtipon na kami, inanay nga migawas ang tinuod niyang kinaiya. Bangis siya nga walay sama. Gawas nga tiggamitan siya sa ginadiling drugas, kanunay na ko niyang dagmalan. Pirme kong mabun-og ilabi na sa panahon nga gusto siyang makighilawas nako. -- Sumpayan pa