Pilipinas nag-una sa teen pregnancy

Sa pagka karon nag-una ang Pilipinas sa Teen Pregnancy sa Southeast Asia, gikan sa edad nga kinse paubos. Makaalarma ang maong kasayuran kay kun magpadayon kini mosamot pagtubo ang populasyon sa mga Pilipino. Unsaon man sa paglingkawas sa kalisod sa pagpuyo sa kinabag-ang Pilipino kun mouswag pa gayod ang gidaghanon sa mga Pinoy.

Alang sa mga nagsuportar sa RH Law, angayan lang gayod nga maimplementar ang maong balaud aron matudloan ang mga batan-on sa paglikay sa sayong pagpakighilawas sa opposite sex. Gikinahanglan na kuno nga adunay sex education sa tulonghaan.

Gidepensahan sa mga nagpaluyo sa maong balaud ang ilang argumento nga wala magpasabot ang sex education sa pagtudlo sa mga estudyante sa hustong pag-sex aron dili momabdos. Husto man usab tuod, kun literal nga pagsabot, dili gyud maayo ang sex education. Apan ang katuyoan niini dili ang pagtudlo sa mga estudyante sa paglikay aron dili momabdos pinaagi sa paggamit sa mga panagang sa pagburos sama sa pills ug condom.

Diha sa sex education ma-edukar ang mga estudyante ilabi na ang mga batan-on pa kaayo sa angay buhaton aron malikayan ang pagpakighilawas sa opposite sex. Angayan lang gayod nga matudloan ang mga batan-on sa pagpakigbatok sa tentasyon kabahin sa pakighilawas. Panahon na nga mabuksan ang hunahuna sa mga batan-on sa dili maayong resulta sa pagpakighilawas nga wala sa hustong panahon nga makadaut kini sa ilang maayong kaugmaon.

Apan alang sa mga supak sa RH Law, dili makaayo sa mga batan-on ang sex education. Ang labing importante nga tudloan ang mga batan-on sa kamahinungdanon sa moralidad. Ilang gisabot nga ang pagmabdos sa mga batan-on tungod sa kakulang sa impormasyon sa moralidad sa tawo. Usa usab sa ilang gihimong rason niini mao ang internet ug intimate relationship.

Hinuon, aduna may punto ang usa’g-usa ka magkaatbang nga grupo. Apan sa kinatibuk-an gayod, anaa gihapon sa pagpasunod ug pag-agak sa mga ginikanan sa ilang mga anak alang sa husto ug maayong dalan nga angayang subayon.