Contempt of court

Ang lihok o buhat sa tawo nga magpakita’g way respeto sa husgado, matawag og contempt of court. Kun sa atubangan sa huwes buhata, matawag nga direct contempt of court. Kun gawas sa husgado buhata, sama sa pagsupak sa Order sa huwes, matawag nga indirect contempt of court.

Ang kastigo sa contempt of court, priso o multa o ang duha. Husgado ra ang magbuot sa gidugayon sa priso ug kantidad sa multa. Way piyansa. Dili kapiyansa ang tawo nga makastigo tungod sa contempt of court.

Usa ka matang sa lihok o buhat nga pakitag way respeto sa husgado, mao ang pagsabasaba. Kun magsugod na ang bista, kinahanglan way selpon nga motingog. Kasagarang multa, P500.00. May huwes sab nga mo-imponer og P1000. Embarguhon pa ang selpon. Di iuli kun di pa kabayad sa multa ang tag-iya.

Biyernes. Alas 9 sa buntag, nia na si Atty. Kevin Limat sulod sa husgado sa MTC lungsod sa Mulado. Duna siya’y motion gipasaka sa pagpaisyu og writ of demolition. Nagsugod na ang bista. Naghulat siya nga matawag iyang kaso. Sa kalendaryo (listahan sa mga kasong tawgunon) ika-26 iyang kaso. Ang nag-un nga 25 ka kaso, mga kasong kriminal.

Amigo niya ang huwes nga si Judge James Hatol. School mates sila sa law school, una lang niya’g duha ka tuig. Sa wa pa nagsugod ang bista, nagkaistorya na sila. Nga dili niya balibaran ang motion. Kay duha ka tuig nang nakadawat ang squatter sa Writ of Execution ug Notice To Vacate. Unya, wa gyud nipatuo.

Napulo ka kaso na ang natawag. Naghulat lang gyud si Kevin. Unya, may selpon nibagting ilawom sa lamesa sa mga abogado. Nalimot diay pagpawong sa selpon nga tua sulod sa iyang attache case. Gidali niya’g punit iyang attache case ug nidagan siya pagawas sa husgado. Nakapahiyom ang mga abogado ug ilang mga kliyente sa gibuhat ni Kevin.

Pagbalik niya sulod sa husgado, gitawag na lang iyang kaso. Gilaktawan ang mga nauna sa listahan. Na-impressed ang huwes nga bisa’g amigo sila, wa gyud nag-abuso si Kevin. Nagpakita gihapo’g kahadlok sa contempt of court.