Ganahan og negosyante

Dear Tita Salie,

Hello. Bag-ohay lang gyod ko nga nakabasa sa imong column ug ganahan ko. Hinaot unta nga imo pud kong tabangan ug tambagan.

Tawga lang ko og si Ms. M. dalaga ug dunay gamay nga negosyo. Gusto lang nako nga i-share kining akong kinabuhi. Naa koy boyfriend karon og 9 months na ang among relasyon. Lately lang akong nadunggan kaniya nga kasal siya sa iyang ex, pero sa Pastor lang tungod kay lain man og tinuohan ang iyang uyab sa una.

Gawas nga kasal siya sa Pastor, duna silay 1 ka anak nga tua karon sa iyang ex. Ang iyang ex, or inahan sa iyang anak duna nay laing partner ug buntis na kini.

Kining akong boyfriend gusto na nga makig live-in kanako, Tita Salie, kay matud niya love kaayo ko niya ug ganahan siya og babaye nga negosyante kay maayo daw motigom og kwarta. Love nako siya pero unsa man tong iyang kasal sa Pastor  legal ba to? Karon nagsuporta lang gihapon siya sa iyang baby. Maayo kaha nga akong ipadayon ang paghigugma kaniya? Unsay akong buhaton? Palihog pasabta ko. Daghang salamat.

* * *

Good day,

Tinuod nga  nindot ikauban ang business minded nga tawo tungod kay makamao gyod kini siyang motigom og kwarta, ug dili kini bastabasta nga mopagawas og kwarta. Kun ang negosyante mopagawas og kwarta, duna kini nakit-an nga return investment. Pero i-make sure lang nga ang imong pagka negosyante ang iyang ganahan kanimo ug dili ang imong negosyo. Kay nasayod kana sa atong panahon karon nga lisod kaayong ilhon ang tinuod nga tawo. Busa mas maayo gyod nga imong ilhon una ang tinuod niyang pagkatawo una ka mohatag sa imong pagsalig kaniya.

I’m not very much familiar sa kasal sa laing religion kun unsay process nga ilang giagian. Apan kun sa ilang kasal niagi gyod sila sa inyong city hall or sa munisipyo, ug duna gyod sila’y marriage contract legal gyod ang ilang kasal. Aron imo gyong masuta ang kamatuoran mahitungod sa status nianang imong hinigugma mas maayo kun imo siyang pakuhaon og “Cenomar” or Certificate of No Marriage. Dinhi inyo gyod nga masayran kun ulitawo pa ba ang imong hinigugma.

So, kun makakuha pa siya og Cenomar, wala pay problema ang inyong gugma. Apan kun legal ang ilang kaminyoon, dugay pa ang panahon nga inyong paaboton ug medyo mogasto pa sila kun ugaling ilang ipa-annul ang ilang kasal. -- Tita Salie