Maria Magdalena - Gula 120

“Lig-on ang mga ebidensiya nga iyang gihatag nako hinungdan nga nakombinser ko. Maong nakahukom ko nga mosekreto og pauli dinhi sa Pilipinas aron pagsuta sa matuod,” nagkanayon si Daniel. “Ug tuod man, nasundan ko gayod kamo sa pagsulod ninyo sa hotel. Gahapon pa ko nga nagbantay kanimo dinhi sa atong palibot, hangtod nga milakaw ka kaganina. Wala pa mo magdungan pagsulod aron dili mailhan. Pero wa magsilbi ang inyong gihimo kay nagsunod-sunod ko nimo, Maria.”

Wala ko magtingog. Gibati ko ang kaulaw sa atubangan ni Daniel.

Kay nabisto na man gyud ko ni Daniel ang akong pagbulingbuling sa among kaminyoon, nagpaabot na lang ko sa sunod nga mahitabo. Nagtuo ko nga mopasaka gayod og kasong adulteryo si Daniel batok kanamo ni Walter.

“Dili ko manghilabot sa kalipay ninyo ni Walter, Maria,” nagkanayon si Daniel. “Ug dili pud ko manghilabot sa iyang pamilya, kay segurado ko nga maguba gyud kini kun ako siyang isumbong sa iyang asawa. Maria, kun siya’y imong kalipay, si Walter, ihatag ko kanimo ang imong kagawasan. Mas maayo pa nga magbuwag ta kay sa magpadayon ka sa pagduhig og lapok sa akong bansagon.”

“U-unsay buot mong ipasabot, Daniel?” Nakapangutana ko.

“Ipa-annul nato ang atong kasal aron dili ka na makapanghilabot nako ug dili na sab ko manghilabot ninyo ni Walter, mag-iyahay ta. Ang mga butang  ug properties nga atong napundar sa atong kaminyoon, ato kanang bahinon pinasubay sa balaud,” matud ni Daniel. -- Sumpayan pa