Hayahay ang Polis

Gula 2

“Taym pa usa, dia na kita sulod sa motel apan wala pa kita magkailhanay... unsa ba’y ngalan nimo?” giingnan ni Larry ang babaye.

Mikunot ang agtang sa babaye. “Dili na kinahanglan kay total one night stand ra ning ato karon, mora’g pawala sa kalagut nako sa akong bana nga akong nasakpan nga nagkuyog sa iyang kabit.”

Milingkud sa kama ang babaye samtang si Larry nahabilin nga nagtindog. “Sigi na maayo kay nagbukal-bukal pa’s kalagot ang akong dugo. Basin maabtan ka nga mapawong na ang akong kasuko tingali og mausab ang akong huna-huna,” sa babaye pa.

Tuod, wala gayud mag-usik og higayon si Larry. “Sigi mao man kaha, walay ilhanay sa atong pagkatawo,” ni Larry pa dayong tukmod paghinay sa babaye ngadto sa kama ug iya dayon kini nga giromansa.

Gipabatyag pag-ayo og mga parayeg  ni Larry ang babaye. Nakabantay siya nga mipiyong ang mga mata sa babaye nga tingali nakabatyag na sa kagilok nga iyang gihimo.

“Dugay na kaayo ko nga wala makatilaw og nindot nga romansa sa akong bana kay panahon nga magdulog  na mi, moderitso na lang og tapuko. Kapoy na tingali didto sa iyang kabit,” matud sa babaye nga mora’g may dala nga pagmahay.

Gihimo ni Larry ang tanan niya nga naantigohan. Mikalit lang sa paghilom ang tibuok lawak. “Pagnga usa kanang suga,” sa babaye pa. Gitumanan ni Larry ang babaye. Nahinangop na lang ‘sab si Larry kay aron dili makita sa babaye ang iyang mga ilhanan.

Daku man gud kaayo ang patik sa dughan ni Larry nga gipatuyo niya sa pagpakulit. Dihang mingiob na ang tibook lawak, gitagsa-tagsa ni Larry sa pagpanangtang ang salimbong sa ilang kalawasan.

Nakabantay si Larry nga mora’g miagulo ang babaye. Gipaspasan ni Larry ang iyang gimbuhaton. Mikalit pagsantup sa huna-huna ni Larry nga pagkaswerte niya niining gabhiona nga nakadimdim og katam-is nga wala niya palandunga.

Natukma usab kay ang iyang asawa nananghid nga magbilar sa namatay niini nga classmate sa high school didto sa Barangay Labangon ug buntag na nga mopauli. “Maayo ka man diay kaayo mokumbati,” giingnan sa babaye si Larry.

Mipahiyom lang si Larry apan nanghambog og gamay’ “Polis gud, lisud kaayo kun magpalupig ta.”

Gisigihan og hapohap sa babaye ang dughan ni Larry. “Ako la’y hatagi sa imong contact numbers kay kontakon lang tika kun gusto ko makigpanuroy nimo,” giingnan sa babaye si Larry. “Tawga lang ko sa Waterfront, pangitaa lang ko, ako si Larry.”

Sa pagpanggawas nila sa motel, mikuot na unta si Larry sa iyang pitaka aron bayran ang ilang obligasyon apan ang babaye maoy mibulontaryo pagbayad. “Ako ang namugos nimo og unfair kaayo kun pabayron tika.” - Sumpayan