Ang iro nga naligsan

Sabado sa buntag. Alas siyete ang takna. Niduol si Urbano sa iyang silingan nag-ehersisyo sulod sa lawn sa iyang residensiya.

“Konsehal, palihug lang hiposa imong iro nga namatay. Basi’g mabaho na,” hangyo ni Urbano sa iyang silingan nga si Isaac.

Nagbarog si Urbano karong buntaga sa atubangan sa gate nga rehas ug nakighinabi ni Isaac sulod  sa iyang gate. Gitudlo sa nauna ang patay’ng iro nga nagligdas atubangan sa gate sa balay ni Urbano. Namid-ok lang si Isaac ug nagmug-ot nga namulong.

“Naa man na’s duol sa imong balay. Ikaw hipos ana!” ni Isaac dayong talikod. Nakapanglingo si Urbano.

“Kaniyahay rang way silingang mobotar nimo!” tuaw ni Urbano sa hilom.

Mga usa ka gatos ka metros luyo sa munisipyo sa lungsod sa Merabo nahimutang ang balay ni Urbano, usa ka magtutudlo. Nakaserbe siya’g watcher sa niaging eleksiyon sa bukiran sa maong lungsod. Atbang sa ilang balay, giulang lang og karsada, ang balay ni kanhi konsehal Isaac. Napildi siya sa niaging eleksyon. Mismo sa iyang mga silingan, way nibotar niya. Taas ug habog ang gate sa iyang balay. Sama sa iyang garbo ug kinaiya. Dunay mga dagkong iro sulod sa ilang lagwerta. Ganiha, dihay nakagawas nga iro sa pag-abli sa maid kay may gidawat nga delivery. Nigukod og laing iro atol nga may sakyanan nagdagan. Naligsan ang iro ni Isaac. Bulldog ang maong iro. Kun kalderitason ang unod niini, di maarang sa tulo ka dagkong kaldero.

Tungod sa gipakitang lihok ni Isaac, napugos si Urbano og buhat sa iyang nahunahunaang buhaton. Nikuha siya’g basiyong sako sa ilang balay. Gisulod niya sa sako ang patay’ng iro. Gikarga niya’g kartilya. Gitulod ang kartilya padulong sa gate sa balay ni Isaac. Pag-abot gyud tungod sa gate, gitikwang niya ang kartilya. Nahulog ang karga tungod gyud sa duha ka panid sa gate nga gitakdo. Inig abli sa gate matandog gyud ang lawas sa iro.

“Bahala na’g pabahoon na niya iyang iro. Basta naa sa tungod sa ila!” tuaw ni Urbano. Ug gipindot niya kadaghan ang doorbell una pa nitulod sa kartilya balik sa ila.

Gusto niyang hataga’g leksiyon ang silingan nga nagarboso ug nahambogero, human nidaug sa unang piniliay diin nakasakay siya pabor sa hangin. Karong wa na siya uyoni sa iya mismong partido, napildi. Apan taas gihapon og garbo.

Mapahiyomon si Urbano nga nagtan-aw sa maid nga nagdangadanga sa gate sa balay ni Isaac. Nidali siya’g sulod sa ilang gate. Nanira ug wa na gyud nilingi. (Katapusan)