Ayaw kasilagi ang imong anak

Dako ang kahiubos ni Lary ngadto sa iyang amahan gumikan sa dili patas nga pagpangga niini sa iyang mga anak. Duha ra sila ka magsuon sila si Lary ug Rodel, si Lary ang kinamagwangan nga anak nila ni papa niya Kanor ug mama niya Telma. Samtang si Rodel ang iyang manghod.

Gagmay’ng sipyat kasaba, yaw-yaw ug pakaulaw dayon ang madawat ni Lary nga mga pulong gikan sa iyang amahan nga si Kanor.

Samtang puro pagdayeg ang iyang madungog kang Rodel nga iyang manghod bisan pa man sa pagkatapulan niini.

Buotan nga pagkabata si Lary nga bisan unsa ang isugo kaniya sa iyang mga ginikanan dili gayud kini makamao mobalibad, pero bisan pa man sa tanan niyang gibuhat, daw sa buta’g bungol ang iyang amahan nga si Kanor ngadto kaniya. Usahay makapangutana na lang si Lary sa iyang kaugalingon, “amahan ko ba kaha si papa Kanor”? Daw gibati niya ang pagduda ngadto sa kaugalingon niyang amahan nga si Kanor gumikan sa dili maayong pagtrato ngadto kaniya. Apan luyo sa mga pagduda ni Lary sa iyang amahan, aduna usab diay sekreto sa kinabuhi si mama niya Telma nga ilang inahan ni Rodel. Nagsabak diay kini daan, sa una niyang hinigugma, pero tungod sa ka pobre sa lalake iya kining gitalikdan ug nagpakasal siya kang Kanor sa pangandoy nga maharuhay ang iyang pagpuyo.

Si Kanor ang lalaking ulahi nga nangulitawo kaniya, nga maoy may pinakalapad Og kayutaan sa ilang dapit. Apan luyo sa pagpakasal ni Kanor kang Telma, wala usab diay kini kalibutan sa sekreto ni Telma nga iyang asawa mahitungod sa tinud-anay nga pagkatawo ni Lary nga ilang anak.

Igo ra diay kining gipaangkon ni Telma kang Kanor nga iyang bana. Usa ka adlaw niana, nagluya si Kanor nga nawagtangan sa iyang kusog sa ilang pag-adto sa doktor didto nila nahibaw-an nga duna siya’y sakit nga kanser sa dugo tungod sa ka mahal sa tambal ug sa kadako sa gasto niini, mabaligya ni Kanor ug Telma ang tanan nilang kayutaan, apil na ang balay nga ilang gipuy-an ug didto nagsugod ang pinakalisod nga yugto sa ilang kinabuhi ni Kanor ug Telma isip managtiayon.

Usa ka adlaw niana usa ka abugado ang niabot sa balay sa magtiayong Telma ug Kanor nga nagdala sa “notice”. “Maayong buntag, ikaw ba si Telma?”, matud sa abogado nga nangayo og katahoran.

“Oo, ako sir”, tubag ni Telma ngadto sa abogado.

“Ah, nia ko’y dalang notice gikan sa negosyanteng nakapalit sa inyong balay ug yuta nga karon na lang mo adlawa kutob kay gamiton na sa bag-ong tag-iya ang luna sa yuta nga inyong gipuy-an”, matud sa abogado. Kahilakon si Telma nga mihangyo sa abogado.

“Ahh, maam adto na lang hangyo sa nakapalit sa inyong yuta, tua siya sa iyang awto nagpaabot,” matud pa sa abogado.

Sa pagduol ni Telma, miabli dayon ang bildong bintana sa nindot kaayong awto, nahasiga ang iyang mga mata sa iyang nakita daw sa namay-ungan niya ang maong tawo.

“Ramon ikaw?”, matud ni Telma nga gibati sa dakung kaulaw sa iyang kaugalingon.

“O, ako kini Telma, ang kanhi mong hinigugma nga si Ramon, nga imong gitalikdan kaniadto tungod kay dili makahatag kanimo sa maayong kaugmaon, ug gikan karon pamahawa na kamo sa inyong pinuy-anan,” matud pa ni Ramon nga  nasilag pag-ayo sa kanhi niyang hinigugma.

Miluhod nga naghilak si Telma nga nangayo’g pasaylo kang Ramon, apan miabot si Lary nga anak ni Telma.

“Sir ayaw awaya akong mama Telma,” matud ni Lary nga mihilak usab. “Ramon kung nasilag ka man kanako, ayaw kasilagi ang matuod mong anak si Lary, wala siya’y labot sa akong mga sala diha kanimo,” matud ni Telma. “Unsay buot ipasabot niini?”, tubag ni Ramon.

“Nagsabak ako daan sa imong binhi nga imong gitisok sa akong sabakan, kaniadto sa wala pa ako nagpakasal kang Kanor ug kining bataa nga anaa sa imong atubangan si Lary siya mao ang matuod mong anak”, pasabot ni Telma ngadto kang Ramon.

Miduol si Lary kang Ramon nga miingon, “ikaw diay ang tinuod kong Papa!” dayo’g gakos sa amahan ug anak. (Kataposan)