Pasayloa ako Padre Bartolo, kay ako nakasala

Way maayong kinatulgan si Padre Bartolo, ning gabhiona. Diha man goy pahibawo ni Noy Ariston, ang tiguwang nga sakristan ning ilang lungsod sa San Fernando, nga adunay babaye nga buot mokumpisal kaniya, ning sayo sa buntag.

Dili tiaw ang kakulba nga gibati karon ni Padre Bartolo sa kadugay na god nga panahon sukad siya giordenahan sa pagkapari, karon pa gayod mokuba ang gibati sa iyang dughan.

Wa pa gani manuktugaok ang mga manok, didto na si Padre Bartolo, sulod sa may kumpisalan.

Takulahaw dihay kahinay ug kakalma sa panuni sa tingog nga nagkanayon.

“Dre ... bendisyoni ako ... ug labaw sa tanan pasayloa ako ... nga sa nalambigit nga kalig-on sa atong pagminahalay ... wa gyod nako damha nga makabudhi ako kanimo!”

“Yuna pa diay Miss ... kinsa man diay ikaw? Buot ako masayod sa imong ngalan?” hupong sa kamatinahuron nga nagpakisayod ang pari.

“Ako bitaw si Miss Porlicinda ... ang babaye nga sa kadugay nang panahon ... kita nagsinaaray nga magminyo?’’ tubag ni Porlicinda.

“Wa kay sala sa nahitabo Porlicinda kay ang tanan pulos gimbut-an sa kahitas-an ... nga maadto ka sa laing binuhat!” kahilakon si Padre Bartolo nga mitubag sa iyang hinigugma.

Wa lang tuyoa, nanumbaye sa may ngilit sa panumdoman ni Padre Bartolo, ang masakit nga handumanan nilang duha ni Porlicinda, samtang sila nagkakita sa may dakbayan sa Pagadian.

Hupong sa kamalipayon ang ilang mga kaagi, sa dihang diha pa si Padre Bartolo, sa seminaryo, samtang si Porlicinda nagtungha pa sa pagka-madre.

Dihay mga pulong nga mahinumdoman si Padre Bartolo, nga hagawhawan siya ni Porlicinda nga magkanayon:

“To forget you Bart ... is a collosal betrayal of our promise and I try to bury our yesteryears!”

Igo lamang molugmaw ang luha ni Bartolo niadtong higayona ug bawsan niya og hagawhaw si Porlicinda, nga nagkanayon:

“Pakamatyan ko kining gugmaha ... Bart ... ug sa ako unyang umaabot nga dangatan ... ikaw Bart ... ug wa nay lain kong mahalon!”

Mibanos ang kahilom ug mibakho si Padre Bartolo, sulod sa kumpisalan ug midangoyngoy. Migawas siya sa kumpisalan ug gihawkan sa tuman si Porlicinda, nga karon kaslonon na og laing binuhat.”

Ug unya miluom ang kahilom ug sa paghilak ni Padre Bartolo og nahinumdom sa pulong ni Porlicinda nga nagkanayon:

“Pasayloa ako Padre Bartolo ... kay ako nakasala! (Kataposan)