Caroline - Gula 4

Nasayran ni Artemio nga ang rason nga wala makabayad si Carol sa nakuha niya nga mga alahas gikan sa asawa sa dakung opisyal sa kapolisan kay mihunong diay og pagpadala’g kwarta ang iyang bana nga tua sa abroad.

Gisaysayan siya ni Carol nga mitoo ang iyang bana sa sipsip sa iyang kabanayan nga namasangil nga duna siya’y lalaki nga gikabuangan. “Unya giunsa nimo sa pagbuhi sa imong kaugalingon nga wala ka na man padad-i og kwarta sa imong bana?”

“Gihinay-hinay nako sa pagpamaligya ang alahas nga akong nakuha gikan sa asawa sa opisyal sa polis. Naglaum ko nga makasabot ra unta ang akong bana nga dili tinuod ang iyang nadawat nga report gikan sa iyang kabanayan,” matud ni Carol.

Gamay ra ang gikaon ni Carol. Sa paniid ni Artemio wala mamakak kaniya si Carol mao nga anam-anam siya nga gibati og kalooy. “Ang pangutana nako karon kun asa ka mokuha og ikabayad sa imong pyansa,” gisubli ni Artemio ang pangutana.

“Hangyo nako nimo sir, dili na ko motinguha pag-ikyas, ubani ko sa balay kay kuhaon nako ang subra nga alahas aron akong ikaprenda para ibayad sa akong pyansa ug nga dili ko mapriso,” matud ni Carol.

Gipasabot ni Artemio si Carol nga supak kini sa ilang lagda apan irisgo niya ang iyang trabaho tungod sa kalooy kaniya. “Yuna pa, og ipahatud lang nimo ang imong gitipigan nga mga alahas,” matud ni Artemio.

“Ako ra ang nagpuyo sa balay, gipapahawa na nako ang among katabang ug wala pa kami anak ug ang akong bana,” pasabot ni Carol.

Miyango-yango si Artemio. “Sigi, tana mohapit ta sa inyong balay apan ayaw tawon ko’g binuangi ha? Art na lang ang itawag nako Carol,” matud ni Artemio.

Dali ra sila nga miabot sa Labangon. Giposasan gihapon ni Artemio si Carol aron pagsiguro nga dili kini moikyas apan gitabonan niya ang posas sa iyang jacket. “Kuota sa bulsa sa akong short pants ang yawe sa pultahan,” ni Carol pa. Swerte kay walay mga tawo nga nakakita kanila.

Misulod dayon sila. Giliraw ni Artemio ang iyang mga mata palibot sa balay. “Pwede tangtangon na nimo ang posas sa akong kamot Art,” matud ni Carol. Misaka sila sa second floor sa balay.

Abli ra ang pultahan sa kwarto. “Ambi palihog ang yawe Art kay buksan nako ang drawer kay dia nako ibutang ang alahas,” giingnan ni Carol ang polis.

Dihang naabli na, nakita ni Artemio nga daghan pa nga alahas ang gitipigan ni Carol. “Hutdon lang nako ni pagdala Art ug patipigan lang nako nimo ang uban kun mapriso g’yud ko,” ni Carol pa. - Sumpayan