Caroline

Gula 2

Miadto dayon si Artemio sa dapit nga giingong anaa magpuyo si Carol -- nga Caroline Tagsip ang tinuod nga ngalan. Miduol si Artemio sa usa ka tindahan dili halayo sa barangay hall sa Labangon. Nagpatuo si Artemio nga mihapit lang aron moinum og softdrinks.

Gihinay-hinay ni Artemio ang pag-inom sa softdrinks ug gipaliraw niya ang iyang mga mata sa palibot. Gipangita ni Artemio ang giingon sa higala niya nga polis nga ang balay ni Caroline pinintalan og yellow green.

Wala dayon niya kini makita. Apan taud-taud, dunay babaye nga miabut sa tindahan nga daw nagsigi og panglingi. Mitutok kini kaniya apan gipahiyoman ra kini ni Artemio.

“Uy guwapa, panagsa na lang lagi ko nimo nga makakita, nagsigi ka lang og puyo sa balay?” matud sa nagbantay sa tindahan. “Mao lagi day, hibalo ka na nga sikat na man kaayo ta karon, daghang nangita,” matud sa babaye.

Nahinumdom si Artemio sa giingon sa iyang higala nga polis nga blonde ang buhok sa gipangita niya nga si Carol. May pagduda na si Artemio kay blonde usab ang buhok niining babaye nga miabot sa tindahan.

Sabon ra ang gipalit sa babaye. Gilantaw ni Artemio ang unahan subay sa gamay’ng dalan-dalan ug nakita niya ang balay nga pinintalan og yellow green. Mibiya ang babaye sa tindahan ug milakaw paingon sa balay.

“Miss may nailhan ka ba nga Jeffrey nga ania magpuyo dinhi? Green man gud kuno ang balay nga gipuy-an,” gipangutana ni Artemio ang babaye nga mihunong pag-abot sa pultahan sa yellow green nga balay.

Karon natibuok na sa iyang huna-huna nga ang babaye mao gayud si Carol. “Wala ko makaila anang Jeffrey nga imong gipangita,” pintok nga tubag sa babaye. “Naa kuno kini gapuyo sa ila ni Carol,” ni Artemio pa.

Misaka ang kilay sa babaye. “Ha? Carol? Ako man si Carol ug wala may nagpuyo dinhi sa amo,” matud sa babaye. “Aw ikaw diay si Carol, polis ko Carol, dia ko kay aduna kay warrant of arrest,” matud ni Artemio dungan sa paggunit sa bukton sa babaye.

Daw nakuratan si Carol nga polis diay ang iyang gikaatubang. Hugot ang paggunit ni Artemio sa iyang bukton. “Tana, uban kanako sa opisina Carol. Ayaw na pagpakita’g pagsupak para dili kaayo eskandalo para nimo,” hinay ang tingog ni Artemio.

Kahilakon si Carol. “Pwede og mag-ilis usa ko?” Gibalibaran ni Artemio ang hangyo ni Carol ug gidala niya kini sa iyang sakyanan nga gi-park sa atubangan sa tindahan. Diha niya kini gipasakay sa front seat. - Sumpayan