Balor sa kalooy

Alas 7 sa buntag. Sa crossing sa mga dalan Mango Ave. ug M.J. Cuenco Ave. Nia na sab si Benjie, 10 anyos, nagbarogbarog. Inig urong sa trapik, magpakilimos siya sa mga sakyanan. Nia na sab iyang suki nga sakyanan. Kalma na siya hatagi og peso ining drayber sa Isuzu Crosswind, nga magbarong. Hamtong na nga lalaki. Mga sayisintahon na ang edad.

Niurong na sab ang Isuzu Crosswind nga abuhon sa lane nga para disilya ngadto sa Hipodromo. Gikan ang Isuzu sa Mango Ave. Sa naandan, nihawong na sab si Benjie sa bintana sa wala sa drayber. Mohukdong lang siya sa bintanang sirado, kakuwarta dayon siya.

Bisa’g mora’g may disgusto ang hinatagan sa drayber, mohatag man gyud. Way tingogtingog nga iyang ablihan ang pultahan mismo (dili ang bintana) unya mahandos ang nawong ug lawas ni Benjie pawala. Unya makita dayon niya ang walang kamot sa drayber nga magtunol og peso.

Gidawat ni Benjie ang peso. Wala sab siya tingogtingog. Di gani magpasalamat. Kay sa pagkatinood, di siya kontento sa peso. Kinagamyan niyang gustong madawat, singko pesos. Labing maayo, diyes pesos. Apan ang mangayo, di man kabuot sa manghatag. Maayo na lang gani kay gihatagan. Apan nakahunahuna si Benjie og diskarte karong buntaga. Kay dugaydugay pa mobalik ang berde nga signal sa trapik. Bag-o pa mang nipula.

Nitan-aw siya sa nawong sa drayber. Nagming siya nga nagpakilooy.

“Unsa pa man?” sa drayber. Nitotok ni Benjie. Higayon na ni. “Malooy ka man kaha sa pobre. Peso ra gyuy balor sa imong kalooy?” ni Benjie.  “Naluoy ko nimo.  Pero way balor akong kalooy. Mahimong mohatag ko nimo o dili. Pero sa kanunay malooy ka sa mga pobre” sa drayber. “Dungagi og singko bi, o diyes ba hinoon” pakilooy ni Benjie. Nibukhad sa toong kamot.

“Hunahunaa ra god. Karong buntaga, wa pa ko kakuwarta. Padulong pa ko’s akong opisina. Samtang ikaw, naa nay peso. Daghan pang ubang sakyanan mohatag nimo’g peso. O mas dako pa” sa drayber.

Niduko si Benjie. Nagpaluodluod.

“Sa akong tan-aw, mokita ka dinhi’g labing minos, dosiyentos pesos ang adlaw. Ihatag kaha nimos imong ginikanan imong kita?” sa drayber.

“Wa man koy ginikanan!” pamakak niya. Bisag iyang ginikanan ang nagsugo niya’g pakilimos. Kay kun dili, bun-ogon siya’s iyang amahang adik ug palahubog.

“Nahala. Kuyog nako sa amo. Kay himoon tikang houseboy. Sweldado ka. Libre karon. Paeskuylahon pa tika kun gusto ka” sa drayber.

“Di lang ko” ni Benjie. Wa siya’y ganang moeskuyla.

“Mao lagi na. Tapulan. Pobre ka. Kay tapulan ka!” sa drayber. Nagduda si Benjie nga pedophile ang drayber. Apan kakuyogon siya.

“Mananghid una kong mamag papa” niya pa. Wa na kadungog ang drayber. Kay nanira na’s pultahan. Kay niberde na ang mga trapik. (Katapusan)