Maria Magdalena

Gula 108

Mitug-an si Mike nako nga wala pa siya makatilaw og himaya sa usa ka babaye. Ako pa ang unang babaye sa iyang kinabuhi.

Pero kontento ko sa performance ni Mike kay bisan siya’g nobatos pa, kugihan man usab kaayo. Hangol pa kaayo sa unod mao nga dili matagbaw sa usa lang ka lovemaking session. Hasta kapila siya magsubli-subli pagkatkat sa kapayas.

Magpulipuli lang sila si Clark ug Mike pag-adto sa akong gipuy-an panahon sa kagabhion. Diha gani higayon nga diriyot sila mag-abot. Wala man gud sila’y kasayoran nga gilumpong ko silang duha. Ako ray nagmaniobra nga dili mi masakpan.

Kausa na lang pud ko moadto sa siyudad aron magkuha sa akong allotment gikan kang Danilo. Mangumpra sab ko alang sa akong tindahan. Basta makadawat ko’g allotment, hatagan sab nako’g ginagmay’ng pahalipay sila si Clark ug Mike. Pang-load lang gud, matud pa. Malipay na niini ang duha ka lalaki nako. Kinsay di nga gawas sa kuwarta, maka-score pa man gyud sila nako ug libre pa.

Usa niana ka higayon nga gikan kong nagkobra sa bangko sa akong allotment, misulod ko sa usa ka desenteng kan-anan nga nahimutang dapit sa Fuente Osmeña. Mi-order ko’g pagkaon kay gigutom ko. Samtang nagkaon ko, dihay lalaki nga miduol kanako.

“Puyde bang makig-share sa imong table, miss beautiful,” sa lalaki pa.

Miyanghag ko pagkadungog sa tingog sa maong lalaki. Apan nakugang ko pagkakita kaniya. -- Sumpayan pa