Lunop ug Baha

Gula 2

Migawas ang babaye gikan sa kotse. “Unsay akong buhaton? Dili na lang ko motrabaho ron uy kay leyt na kaayo ko,” matud sa babaye nga mikuot sa iyang selpon gikan sa iyang bulsa sa pantalon. Nadunggan ni Siegfred nga may gipahibalo ang babaye nga dili na lang siya motrabaho kay naabereya ang iyang sakyanan.

“Kinahanglan nga pagawason nato ang tubig nga anaa mapundo sa tambutso kay basin og masulod ni ngadto sa makina. Suwayan nako’g paandar ha? Sugot ka?” giingnan ni Siegfred ang babaye. “Sige kuno palihog bi, tabangi ko,” dali nga tubag sa babaye. Bana-bana ni Siegfred mga 19  ngadto sa 21-anyos ang pangedaron sa babaye ug wala kini kasinatian sa makina.

Gi-start ni Siegfred ang makina apan wala gayud moandar. Nakasabot siya nga nagtigom pa kini og igo nga hangin aron mapagawas ang tubig nga nasulod sa tambutso. Taud-taud may tilimad-on na nga moandar ang makina. Nagpurot-purot apan gipaninguha ni Siegfred nga makaandar gayud ang makina.

Paminaw ni Siegfred nagkahinay ang kusog sa bateri sa sakyanan sa babaye. “Pahuwayon usa nato kay aron makapundo og kusog ang bateri. Ayaw kabalaka, sa sunod nga arangkada sa makina moandar na ni,” matud ni Siegfred nga mihatag og paglaum sa babaye. Mipahiyom ang babaye nga nakadungog sa pasalig ni Siegfred.

“Siegfred diay ang akong ngalan, empleyado ko sa usa ka opisina diha sa unahan apan na-stranded sa lunop,” paila ni Siegfred ngadto sa babaye. Gitunol sa babaye ang tuo niya nga kamot ngadto kang Siegfred. “I’m Pamela, usa ako ka med-tech,” matud sa babaye.

Gisaysay ni Pamela nga gikan siya sa City Hall ug mopaingon na unta sa usa ka ospital sa Gorordo Avenue mao nga misungasong siya sa lunop-baha. “Suwayi kuno kun moandar na ba Fred,” may pagka paraygon na ang tingog ni Pamela nga nagkailhanay na sila si Fred.

Tuod, milingkod si Fred sa atubangan sa manobela ug gi-switch on ang starter. Sa kataposan, miandar gayud ang makina sa kotse ni Pamela. Girebolusyon kini pag-ayo ni Fred aron nga mokarga ang alternator ngadto sa bateri.

“Nagsirit-sirit ang tubig sa luyo Fred,” matud ni Pamela nga daw gikuyawan nga nagtan-aw sa tumoy sa tambutso sa iyang sakyanan. “Ayaw kahadlok, mao kana ang tubig nga misulod sa tambutso ganina nga nakapawong sa imong makina,” pasabot ni Fred.

Wala madugay, mibalik na sa natural ang inandaran sa makina sa kotse ni Pamela. “Hala unsa may akong ibayad nimo sa imong natabang nako Fred? Mangaon na lang ta, ako’y bangka nimo,” matud ni Pamela. Wala na motingog pa si Fred. - Sumpayan