Abtik sa tsiks

Gula 5

Nakahukom ang magbarkada nga mokawas sila sa dagat aron mokaon sa gidala nila nga mga pagkaon.

Giatiman pag-ayo ni Clifford si Fatima. Siya mismo ang nagkuha og pagkaon para sa dalaga ug nagtupad sila sa pagpanglingkod. “Ayaw kauwaw Fat kay nahibalo ko nga gigutom ka na ‘sab,” giingnan ni Clifford si Fatima.

“Maayo pa’g nagdala ‘sab mi sa among uyab da, nasuya kaayo mi nga kami ra’ng duha ang walay partner,” matud nila ni Loloy ug Abner nga mga barkada ni Clifford.

Miduko si Fatima kay gibati siya’g kauwaw nga gisungog sila sa mga barkada ni Clifford. Aron sa pagwagtang sa kauwaw, misakay na lang si Fatima sa pagpangomedya.

“Ayaw mo pagsige og komedya uy kay mahagit unya si Clifford basin og matagbaw ko og panubag,” ni Fatima pa nga nagpahiyom. Gipanid-an ni Fatima kun unsay reaksyon ni Clifford. Mipahiyom ang ulitawo ug daw hilaw kaayo ug nagpasiklap kang Fatima. Gikataw-an sila sa ilang mga barkada nga mipasiaw kaayo kanila. “Kami ra g’yud ang inyong gikomedyahan da,” matud ni Clifford.

Ang komedya ngadto kanila ni Clifford ug Fatima mao hinoo’y nakapasuod pag-ayo sa duha. Ingon sa gihatagan sila og higayon sa ilang mga barkada kay nag-ulhos-ulhos lang sila og sibat balik sa dagat ug sila na lang duha ang nahabilin sa ilang cottage.

Namalik sila paglusad sa dagat apan kalit lang natakilpo si Fatima. Nalup-og si Fatima mao nga dali kini nga giabagan ni Clifford aron makatindog pagbalik. Si Clifford na gani maoy mipapha sa mga bas nga namilit sa bitiis sa dalaga.

“Thank you Clifford,” ni Fatima pa. Wala sila makabantay nga nagtutok diay kanila ang ilang mga barkada nga didto sa dagat. Nalantawan ni Clifford si Loloy nga maoy daku kaayo’g ngisi nga naglantaw kanila.

“Wala ba malisa ang imong tiil sa pagkalup-og nimo Fat?” gisukna ni Clifford ang maanyag niya nga amiga. Igo lang milingo-lingo si Fatima samtang nagpahiyom. “Ayaw lang palabi’g concern Cliff uy kay mingawon ta nimo ana,” matud ni Fatima.

“Mas malipay ko nga mingawon ka nako Fat para nga dili na kita magkalagyo,” matud ni Clifford ngadto ni Fatima. Mora’g nahibulong si Fatima sa iyang nadungog. “Ngano man nga malipay ka man nga mingawon ka nako?”

Nagngisi si Clifford. “Panggaon g’yud tika aron nga mingawon ka nako ug dili ko nimo kalimtan. Gusto ko nga dili karon maoy kataposang adlaw sa atong panag-uban.” Nangaligo sila pagbalik ug gigunitan na ni Clifford ang kamot ni Fatima samtang sila nanglakaw sa taga hawak nga tubig. - Sumpayan