Maria Magdalena - Gula 100

“Kinsay imong bisita?” matud ko.

“Si Walter,” tubag ni Daniel.

Gisaysay ni Daniel kanako kun kinsa si Walter. Iya diay kining higala nga tua pud sa gawas magtrabaho. Managsama sila’g agency.Napupos na pud ang kontrata ni Walter maong mipauli na kini sa Cebu. Taga Antequera, Bohol usab si Walter apan sa Mandaue City na siya nagpuyo tungod kay taga Mandaue man ang iyang asawa.

“Mangandam ta’g sayo ugma,” ni Daniel pa. “Maghikay ta’g lamiang mga pagkaon. Magpalit ta’g alimango kay paborito ni Walter.”

“Ikaw ang mag-igo,” matud ko. “Unsa man diay’ng orasa moanhi si Walter ugma?”

“I-atol kuno niya sa tingpaniudto,” maoy tubag.

“May mga kauban ba siya?”

“Wala man magsulti. Pero posibleng may mokuyog gyud niya. Barkadista man gud kaayo nang tawhana sukad pa kaniadto ug chickboy pa gyud.”

Wala na ko motubay sa ulahing gisulti ni Daniel.

Pagkaugma sa buntag, sayong milakaw si Daniel. Wala na siya sa akong tupad sa akong pagmata. Mibangon ko ug naghikay sa among pamahaw didto sa kusina. Wala ko na lang pangitaa si Daniel. Nagtuo ko nga nag-jogging siya’g sayo.

Pagkataudtaod nahiabot si Daniel sa balay nga nagbitbit sa daghan niyang mga pinalit. -- Sumpayan pa