Maria Magdalena - Gula 99

“Magpabilin kitang magtiayon hangtod sa hangtod bisan wala kita’y anak. Dawaton ta ang kamatuoran kay pagbuot kini sa Diyos,” matud ni Daniel.

Makita gyud kang Daniel ang pagkarelihiyoso. Nalipay ko sa gisulti ni Daniel kanako. Gigakos ko siya. Mibalos sab siya paggakos nako ug gihagkan ang akong aping. Unya naanod ming duha sa karomantiko sa higayon. Nahitabo ang seksuwal nga panagtagbo tali namong duha.

Ang tinuod wala ko mahadlok nga mausab ang pagtagad ni Daniel kanako tungod sa iyang nasayran nga dili ko siya kahatagan og anak. Ang lintunganay sa akong kahadlok mao nga basin og makahunahuna siya sa pagpakigbulag nako. Interesado ra ba gayod siyang makabaton og anak. Tingalig mangita siya’g babaye nga makahatag kaniya’g anak. Anugon kaayo ang allotment nga akong madawat gikan kaniya kun makigbulag siya nako. Walay bale bahin sa sex kay naa may daghang mga lalaki nga makapuli sa iyang dapit ug kaakohan diri nako. Ang kuwarta na lang niya ang akong giapas.

Namauli dayon mi sa Ginatilan nianang adlawa sakay sa V-hire. Alas kuwatro sa hapon nahiabot na kami sa Ginatilan. Igo lang ming nakasulod sa balay, mibagting ang cellphone ni Daniel. Gitubag ug gipakigsultihan niya ang nanawag. Taudtaod gyud silang nagsulti.

“Duna ko’y bisita ugma, Loves,” matud ni Daniel human niya pakigsultihi ang nanawag sa cellphone. -- Sumpayan pa