Tungod sa motorsiklo

Gihangyo ni Albert ang iyang amahan nga palitan siya’g motor apan dakong supak ang iyang inahan.

“Ang motor, dili gayod kana maayo nga butang sa balay,” pulong sa iyang inahan.

“Daghan na kaayo ang mga tawo nga tungod sa motor, sayo kaayo nga nahiagom sa ilang kamatayon, busa, dili gayod ako mosugot nga imong palitan si Albert og motor. Kay kun mosupak gayod siya, maayo pag magkalot na lang siya sa iyang lubnganan.”

Hinuon, mosugot ang inahan ni Albert nga palitan siya’g motor sa kondisyon nga dili na siya maghubog-hubog.

“Akogn isaad kanimo, mommy, nga kun duna na ako’y motor, dili na ako mahubog,” pulong ni Albert.

“Mahimo kaha kana nga kun malabyan ka lang og panet sa Tanduay mahubog kana dayon,” matud sa inahan. “Ambot lang kaninyo.”

“Sige lang, mommy. Hatagan nato siya’g higayon,” pulong sa amahan. “Ang tawo may pagka usab ug hinaot nga mausab si Albert kun duna na siya’y motor.”

Naparot gayod ang kagustohan sa inahan kay mipabor man ang amahan. Busa, pila ka adlaw, duna nay motor si Albert. Si Albert pa gayod ang nagbuot sa kadako sa motor kay matud pa niya, maayo kuno kanang dako aron kusog modagan.

Pipila lang ka adlaw sukad makapalit si Albert og motor, nahitabo dayon ang butang nga gikahadlokan sa inahan. Wala palandonga nga nahiagom si Albert sa digrasya dihang usa ka baka ang kalit lang mitabok sa karsada. Maayong pagka lubag ang manobela sa motor ni Albert hinungdan nga maayong pagka lintuwad sa motor ug mibangga kini sa punoan sa kahoy. Maayong pagkadaot sa motor ug ang grabeng pagkadaot mao ang duha ka paa ni Albert. Matud pa sa doktor nga maoy mihiling kang Albert, hayan nga sa tibuok niyang kinabuhi mahimong usa ka bakol na si Albert.

Gibasol sa asawa ang bana nganong misugot  man kini nga palitan gayod si Albert og motor kay kun wala pa, dili unta mahitabo ang mao nga madisgrasya. Apan, unsaon man nga nahitabo na man ang disgrasya. Busa, wala silay mahimo kun mao ang tuga sa kapalaran. Si Albert kutob na lang sa paghilak sa nahitabo kaniya. (Kataposan)